Հայաստանը չի կարող համատեղել անդամակցությունը Եվրամիությանը և Եվրասիական տնտեսական միությանը
ՔԱՂԱՔԱԿԱՆՈՒԹՅՈՒՆ
ՀՀ-ի հնարավոր անդամակցությունը Եվրամիությանը չի կարող համատեղվել Եվրասիական տնտեսական միությանը անդամակցության հետ, ասել է ՄԳԻՄՕ-ի միջազգային հարաբերությունների ինստիտուտի առաջատար գիտաշխատող Նիկոլայ Սիլաևը «Կարծիք» հաղորդման եթերում, գրում է News-front.su–ն։
«Երբ Հայաստանում քննարկվում էր երկրի անդամակցության մասին օրենքը, ավելի ճիշտ՝ այն հայտարարությունը, որ Հայաստանը ցանկանում է անդամակցել ԵՄ-ին, Ռուսաստանից՝ Եվրասիական տնտեսական միության հետ կապված հարցերով զբաղվող փոխվարչապետ Օվերչուկի մակարդակով հիշեցվեց Երևանին, որ Եվրամիությանը անդամակցելու ծրագրերը անհամատեղելի են Եվրասիական տնտեսական միությանը անդամակցության հետ», - ասել է Նիկոլայ Սիլաևը։
Փորձագետը ենթադրել է, որ ՀՀ վարչապետ Նիկոլ Փաշինյանը պատրաստում է հասարակական կարծիքը ՀՀ-ի ԵՄ-ին անդամակցելու վերաբերյալ հանրաքվեի անցկացման կապակցությամբ։ «Անցել է մի քանի ամիս, և ՀՀ վարչապետը կրկնել է նույն թեզը, որը փոխանցվել էր Ռուսաստանից։ Վերջապես այն ընդունվել է ՀՀ իշխանությունների կողմից», - նշել է Սիլաևը։
Վերլուծաբանի կարծիքով ԵՄ-ին ենթադրյալ անդամակցության համար ԵԱՏՄ-ից դուրս գալը ճգնաժամ կառաջացնի Հայաստանում, քանի որ Եվրասիական միությունը մնում է հայկական տնտեսության աճի հիմնական գործոնը։ «Ռուսաստանի հետ այլևս առևտուր չկա, իսկ ԵՄ-ին անդամակցություն դեռևս չկա, և ոչ ոք չգիտի, թե ինչպես հաղթահարել այդ անցումային շրջանը։ Եվ ահա գլխավոր հարցը, որին Հայաստանի բնակիչները պետք է պատասխանեն իրենք. արդյո՞ք պատրաստ են Եվրամիության կասկածելի օգուտի դիմաց հրաժարվել այն գործնական օգուտներից, որոնք այժմ ունեն», - հավելել է ՄԳԻՄՕ-ի առաջատար հետազոտողը։
Նյութը հրապարակման պատրաստեց Կամո Խաչիկյանը
