Քպական պատգամավորները գրում են իրար վրա

Ալեն Սիմոնյանի դիմումի հիման վրա պատգամավոր, «Շիշ բռնող» մականունով Հայկ Սարգսյանի նկատմամբ հարուցվել է կարգապահական վարույթ, որի արդյունքում վերջինիս հայտարարվել է խիստ նկատողություն։ «Քաղպայմանագրից» հայտնում են, թե զուգահեռ Հայկ Սարգսյանն էլ է դիմում ներկայացրել Ալեն Սիմոնյանի նկատմամբ կարգապահական վարույթ հարուցելու մասին։ Կուսակցության վերահսկող հանձնաժողովն Ալեն Սիմոնյանի նկատմամբ կարգապահական վարույթ հարուցելու հիմքեր չի հայտնաբերել։

Մեր տեղեկություններով՝ Հայկ Սարգսյանը գրավոր պահանջ էր ներկայացրել, որպեսզի Ալեն Սիմոնյանին հեռացնեն կուսակցությունից։ Իր դիմումում Սարգսյանը պատճառաբանել էր, որ երբ ինքը օրենքի նախագիծ է գրել բուքմեյքերական ընկերությունների հարկերը բարձրացնելու համար, Ալեն Սիմոնյանը ջղայնացել է, քանի որ խաղադրույք ընդունող ընկերությունից ֆինանսական շահ ունի։

Այն, որ «Քաղաքացիական պայմանագիր» կուսակցությունում բավականին լուրջ խնդիրներ կան, և տարբեր խմբավորումներ փորձում են իրար վրա «բոչկա» գլորելով սեփական դիրքերն ամրապնդել, ինչպես նաև Փաշինյանի մոտ գցել մյուսներին, գաղտնիք չէ։ «Շիշ բռնող» մականունով Հայկ Սարգսյանը փորձել է սեփական կլանն ստեղծել «Քաղաքացիական պայմանագրում», թեպետ՝ անհաջող։ Հիշեցնենք, որ նրա հայրը դեռևս Քոչարյանի օրոք մի քանի տարվա ազատազրկման էր դատապարտվել՝ կոռուպցիոն տարբեր հոդվածներով անցնող Զարեհ Սարգսյանը, ով մտերիմ հարաբերություններ ունի Նիկոլ Փաշինյանի հետ։ Խոսվում էր, որ հեղափոխության ժամանակ նա զգալի գումարներ էր փոխանցել Փաշինյանին։ Փաշինյանը վարձահատույց էր եղել Զարեհ Սարգսյանի երկվորյակ որդիներից մեկին իր օգնական, մյուսին էլ պատգամավոր դարձնելով, թեպետ մամուլում տեղեկություններ էին շրջանառվում, որ Զարեհ Սարգսյանը չափազանց շատ է ցանկանում դառնալ Հայաստանի փոխվարչապետ։

Ըստ էության, այժմ էլ Զարեհ Սարգսյանը և իր որդիները ցանկանում էին Ալեն Սիմոնյանին և այլ անձանց հեռացնել «Քաղաքացիական պայմանագրից», թուլացնել նրանց ազդեցությունը, փոխարենը ավելացնել իրենցը։ Ի վերջո, ըստ ՔՊ վերահսկիչ հանձնաժողովի, խիստ նկատողություն հայտարարվել է հենց Հայկ Սարգսյանին, իսկ Փաշինյանն առայժմ ներել է Ալեն Սիմոնյանին, թեպետ վերջինս ինքն էլ հարվածի տակ է, և վաղ թե ուշ իշխանության ձեռքերը նրան ևս կհասնեն։ Ամեն դեպքում կարելի է «ողջունել» քպական պատգամավորներին, որ ինքնամոռաց տրվել են իրար վրա գրելու գործընթացին։ Սա ևս մեկ անգամ վկայում է, որ ՔՊ-ն, որպես այդպիսին, թիմ չէ և ընդամենը հանցավոր շահերով իրար կապված փոքրիկ խմբակ է։

Արմինե Նալբանդյան