ՌԴ-ն մեկ երրորդով կրճատել է արտասահմանյան գինու ներմուծումը. Հայաստանը խոշորագույն վաճառողների տասնյակում է

Ռուսաստանը առաջին կիսամյակում մեկ երրորդով կրճատել է օտարերկրյա գինու ներմուծումը, ընդ որում, խոշորագույն մատակարարների հնգյակից դուրս է մնացել Գերմանիան։ Այս մասին են վկայում ՌԻԱ Նովոստիի հաշվարկները՝ հիմնված ազգային վիճակագրական ծառայությունների տվյալների վրա։

Այս տարվա առաջին վեց ամիսներին օտարերկրյա մատակարարները ռուսաստանյան շուկա են վաճառել 304.5 միլիոն դոլարի գինի՝ նախորդ տարվա նույն ժամանակահատվածի 433.8 միլիոն դոլարի դիմաց։

Առաջին կիսամյակում խոշորագույն արտահանողը մնացել է Իտալիան, թեև նրա մատակարարումները կրճատվել են ավելի քան մեկ երրորդով՝ մինչև 83.3 միլիոն դոլար։ Առաջատարից փոքր-ինչ հետ է մնացել Վրաստանը, որտեղից ներմուծումը ևս նվազել է մոտ մեկ երրորդով և կազմել 72.8 միլիոն դոլար։ Առաջատար եռյակը եզրափակում է Լատվիան՝ մատակարարումների քառորդով նվազումով՝ մինչև 47.7 միլիոն դոլար։

Չորրորդ տեղում մնում է Լեհաստանը, ընդ որում, նրա վաճառքները Ռուսաստան, ընդհակառակը, աճել են գրեթե 3%-ով՝ հասնելով 31.3 միլիոն դոլարի։

Չնայած արտահանման գրեթե 18%-ով կրճատմանը, Պորտուգալիան կարողացել է զբաղեցնել հինգերորդ տեղը՝ 15.4 միլիոն դոլարի արտահանումով։ Սա տեղի է ունեցել Գերմանիայի մատակարարումների կտրուկ կրճատման պատճառով՝ 2.2 անգամ՝ մինչև 8.8 միլիոն դոլար, ինչի հետևանքով երկիրը հինգերորդ տեղից իջել է յոթերորդ տեղ։ Միևնույն ժամանակ, վեցերորդ տեղում մնացող Չիլին ավելացրել է մատակարարումները՝ մեկ հինգերորդով՝ մինչև 12.2 միլիոն դոլար։

Ռուսաստանյան շուկա գինու հիմնական վաճառողների տասնյակում են նաև Լիտվան (6.7 միլիոն դոլար), Իսպանիան (6.4 միլիոն դոլար) և Հայաստանը (4.3 միլիոն դոլար)։