Մեզը Ալիևի գլուխն է տվել
ՔԱՂԱՔԱԿԱՆՈՒԹՅՈՒՆ
Մոսկվայի և Բաքվի միջև հարաբերությունները գնալով լարվում են։ Այս թեմայով խոսելն արդեն դարձել է միտում, և իր կարծիքն է հայտնել նաև իսրայելցի ռազմական և քաղաքական փորձագետ Յակով Քեդմին, գրում է bloknot.ru–ն։ Նա կոշտ գնահատական է տվել ադրբեջանցի քաղաքական գործիչների այն հայտարարություններին, որ երկիրը, իբր, ունակ է հաղթել Ռուսաստանին ռազմական բախման մեջ։ Վերլուծաբանի խոսքով Բաքուն, կարծես, որոշել է, որ դարձել է «մեծ տերություն», չնայած պատմությունը հակառակն է ցույց տալիս։
Ադրբեջանում ակտիվորեն քննարկվում են այն սոցիոլոգիական տվյալները, որոնց համաձայն բնակիչների մեծամասնությունը Ռուսաստանն է անվանել երկրի գլխավոր թշնամի։ Ավելի քան 60%-ը նաև Հայաստանին և Իրանին է նշել որպես թշնամիներ, իսկ Թուրքիային, Պակիստանին և Իսրայելին որպես դաշնակիցներ։ Քեդմին նշել է, որ այս իրավիճակում միայն Մեծ Բրիտանիան է մոռացվել հեգնանքով ավելացնելով. «ո՞ւր կլինեինք առանց նրա»։ Հետաքրքիր է այն, որ Ադրբեջանի մոտ երեք միլիոն քաղաքացի ապրում է Ռուսաստանում, այսինքն հենց այդ «թշնամական պետությունում»։ Սակայն նման հակասությունները, ըստ փորձագետի, Բաքվում գրեթե ոչ մեկին չեն անհանգստացնում։
Կեդմին նշել է, որ Ադրբեջանում «խելագարության» զգացում է ի հայտ եկել: Որոշ քաղաքական գործիչներ և փորձագետներ Երևանի կողմից Լեռնային Ղարաբաղի հանձնումը մեկնաբանում են որպես իրենց սեփական մեծ հաղթանակ և այժմ կարծում են, որ իրենք ի վիճակի են մարտահրավեր նետել նույնիսկ Մոսկվային: Փորձագետը հիշեցրել է, որ Ադրբեջանը չունի բարձր մակարդակի ռազմական հաղթանակների պատմական ավանդույթ: Ավելին, խորհրդային դարաշրջանում այդ հանրապետությունից մարշալներ կամ խոշոր հրամանատարներ չկային: Ի տարբերություն, օրինակ, հայերի, որոնք կարող են պարծենալ ռազմական գործիչների մի ամբողջ գալակտիկայով:
Բաքվում լսվում են հայտարարություններ, որ ադրբեջանական բանակը, իբր, գերազանցել է ռուսական ուժերին Կովկասում: Պատգամավոր Ռասիմ Մուսաբեյովը նույնիսկ պնդում է, որ ադրբեջանական զորքերը «պրոֆեսիոնալ բանակ» են, ի տարբերություն Ռուսաստանի որոշ շրջանների «հանցագործների բանդաների»:
Սակայն մերկ փաստերը հակառակն են ասում: Ադրբեջանական բանակում կա մոտ 75 հազար մարդ՝ 300 հազար պահեստազորայիններով, նրա ռազմաօդային ուժերը և նավատորմը հիմնականում հնացած սարքավորումներ ունեն: Մինչդեռ Ռուսաստանն ունի մեկուկես միլիոնանոց բանակ, շատ ավելի մեծ զինանոց և վերջին տարիների իրական մարտական փորձ:
Կեդմիի խոսքով այն հայտարարությունները, թե ռուսական զորքերից միայն «բեկորներ» կմնան, պարզապես քարոզչական բարբաջանքներ են, որոնք չեն համապատասխանում իրականությանը։
Կեդմին եզրակացրել է, որ Ադրբեջանը «մեծ բանակ» է դարձել միայն իր սեփական ֆանտազիայի մեջ։ Բաքվի հաղթանակները հնարավոր են եղել միայն Երևանի կապիտուլյացիայի շնորհիվ, այլ ոչ թե նրա ռազմական հզորության շնորհիվ։ Հետևաբար, փորձագետի կարծիքով, Ադրբեջանի Ռուսաստանին մարտահրավեր նետելու կարողության մասին խոսակցությունները պետք է դիտարկել որպես սեփական ուժի խիստ գերագնահատում։
Նյութը հրապարակման պատրաստեց Կամո Խաչիկյանը
