«Ադրբեջանը ՀՀ տարածքում ունի ռազմական ներկայություն շուրջ 100 կետերում»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Վարչապետ Փաշինյանը և արտգործնախարար Արարատ Միրզոյանը իրենց վերջին զրույցներում անդրադարձան Հայաստան-Ադրբեջան փոխադարձ տարածքային գրավումներին:
Ի պատասխան քննադատությունների, որ Ադրբեջանը չի հեռանում ավելի քան երկու հարյուր քառակուսի կիլոմետր զավթած հայկական տարածքից, որ եղել է 2021 թվականից ի վեր, վարչապետն ու արտգործնախարարը հերթական անգամ ակնարկեցին, որ դրանց լուծում է տրվելու սահմանազատման և սահմանագծման ընթացքում, ինչպես նաև պնդեցին, որ մենք էլ գրաված տարածքներ ունենք Ադրբեջանում:
Թվում է՝ Փաշինյանի և Միրզոյանի ասածները ճշմարիտ են:
Ամբողջ խնդիրն այն է, որ մեր՝ Խորհրդային Ադրբեջանի քարտեզից գրավյալ հող ունենք մինչև 2020 թվականի պատերազմը և ոչ մի մետր հող չենք գրավել հեղափոխությունից հետո, մինչդեռ նույն հեղափոխությունից հետո է, որ Ադրբեջանը Արցախից ու վերահսկելի տարածքներից բացի զավթել է ՀՀ սուվերեն տարածքից հողաշերտեր:
Ավելին, այսօր Ադրբեջանը ՀՀ սուվերեն տարածքում ունի ռազմական ներկայություն շուրջ 100 կետերում և փորձում է ներկայացնել քարտեզներ՝ ապացուցելու, որ դրանք ադրբեջանական տարածքներ են, որոնք Հայաստանին են անցել խորհրդային տարիներին:
Այդուհանդերձ, պետք է ընդգծենք, որ Հայաստանը այսօր չունի բավարար ռազմական ու դիվանագիտական ներուժ՝ Ադրբեջանին հեռացնելու գրավյալ հայկական տարածքներից»։