Ադրբեջանը խելագարորեն սլանում է Ռուսաստանի հետ հարաբերություններում անդառնելիության կետին
ՔԱՂԱՔԱԿԱՆՈՒԹՅՈՒՆ
Ադրբեջանի նախագահ Իլհամ Ալիևը հերթական հակառուսական հայտարարությունների շարքն է արել: «ԱզերԹաջ» պետական գործակալությանը տված հարցազրույցում նա ասել է, որ Ադրբեջանի 1920 թվականին ԽՍՀՄ մտնելը օկուպացիա էր: Ռուսաստանում Ադրբեջանի նախագահին անմիջապես հիշեցրել են, որ իր հայրը՝ Հեյդար Ալիևը, ղեկավարել է Ադրբեջանական ԽՍՀ ՊԱԿ-ը և ԽՄԿԿ Կենտրոնական կոմիտեի քաղբյուրոյի անդամ է եղել, նրա հրամանով ձերբակալվել են անկախության համար պայքարողներ՝ թուրքական հետախուզության կողմից հավաքագրված խորհրդային բանակի դասալիքներ, ահաբեկչական կազմակերպությունների ներկայացուցիչներ, իրանական և ամերիկյան հատուկ ծառայությունների գործակալներ: Ավելին, Ադրբեջանի առաջին նախագահն ինքն է հպարտությամբ հիշել դա: Սակայն այս հակասությունները Բաքվում ոչ մեկին չեն անհանգստացնում: Խաղաղության և ժողովրդավարության կովկասյան ինստիտուտի կոնֆլիկտոլոգիայի և միգրացիայի բաժնի ղեկավար Արիֆ Յունուսովն է այդ մասին ասել «Դոժդ» արտասահմանյան գործակալ հեռուստաալիքին տված հարցազրույցում, գրում է politnavigator.news-ը:
«Խորհրդային Միության տարածքում ռուսական զորքերի կողմից Ադրբեջանի օկուպացիայի մասին հայտարարությունը ոչ միայն նորություն չէ Ադրբեջանի համար, այլ նաև այդ մասին գրված է մեր դասագրքերում 90-ականների սկզբից։ Մեր երեխաները մեծացել են դրանով։ Երևի սա նորություն է Ռուսաստանի համար։ Հետևաբար, նման արձագանքը մեզ զարմացրել է», - ասել է Յունուսովը։
Նա կարծում է, որ Ադրբեջանի և Ռուսաստանի միջև հարաբերությունների շարունակական վատթարացման մասին ավելի շատ վկայում են Ուկրաինային աջակցելու մասին Ալիևի վերջին հայտարարությունները։ Յունուսովը պնդել է, որ Բաքուն ընտրել է ԱՄՆ-ի հետ մերձեցման ուղին և աստիճանաբար Ռուսաստանին դուրս կմղի Կովկասից։ Անդարձելիության կետը կանցնի, երբ Ադրբեջանում կհայտնվի ամերիկյան ռազմական բազա։
«Սա հիմնված է Հարավային Կովկասում ԱՄՆ-ի նման աշխարհաքաղաքական խաղացողի ի հայտ գալու վրա։ Ակնհայտ է, որ Ռուսաստանը այնտեղ տեղ չի ունենա։ Հայաստանում արդեն իսկ ընթանում են բողոքի ցույցեր Շիրակում ռուսական ռազմական բազայի դեմ։ Մենք պետք է հասկանանք, որ այս ամենը նույն շղթայի օղակներն են։ Ռուսաստանը հիանալի հասկանում է, թե ինչպես կավարտվի այս ամենը իր համար։ Մենք սպասում ենք Ռուսաստանի արձագանքին», - ասել է Յունուսովը։
Հնարավոր է, որ Ռուսաստանի արձագանքն արդեն իսկ եղել է։ Վերջերս Մոսկվայում ձերբակալվել է Ալիևի անձնական ընկերը՝ «Սատիրա» թատրոնի նախկին տնօրեն Մամեդալի Աղաևը։ Դրանից առաջ էլ Ադրբեջանի թվային զարգացման և տրանսպորտի նախարարությունը հայտնել էր «Դելտա-Տելեկոմ» ինտերնետային ցանցի վրա լայնածավալ D-Dos հարձակման մասին, որը հանգեցրել էր բջջային ինտերնետի աշխատանքի զանգվածային խափանումների։ Խնդիրներ են թաքնված նաև Բաքվի հարավում։ Իրանը կալանավորում է Նախիջևանից Ադրբեջան ուղևորվող ադրբեջանական ծանր բեռնատարները։ Հիմա ոչ ոք նույնիսկ չի հիշում Օդեսայում Ադրբեջանի պետական նավթային ընկերության՝ SOCAR-ի օբյեկտների վրա հրթիռային հարձակումները։ «Ալիև կրտսերը վաղ թե ուշ կստանա իր ցանկալի բաց հակամարտությունը Ռուսաստանի հետ, որը, անկասկած, տխուր կավարտվի նրա համար», - իր TGC-ում կանխատեսել է «Ցարգրադ» հեռուստաալիքի սյունակագիր Ալեքսեյ Պիլկոն։
Նյութը հրապարակման պատրաստեց Կամո Խաչիկյանը
