Եվրոպան չի ցանկանում Ադրբեջանից կեղտոտ նավթ գնել
ՔԱՂԱՔԱԿԱՆՈՒԹՅՈՒՆ
Տանկերը մեկ ամսից ավելի է, ինչ Ադրբեջանից օրգանական քլորիդներով աղտոտված նավթ է տեղափոխում։ Նավը մնում է Ատլանտյան օվկիանոսում։ Ըստ երևույթին, սեփականատերը չի կարող վաճառել խմբաքանակը, գրում է EAdaily.com–ը։
«Դելտա Բլու» տանկերը մնում է Ատլանտյան օվկիանոսում՝ Պորտուգալիայի ափերի մոտ։ Դա են վկայում նավերի AIS տվյալները։ Մինչև 158 հազար տոննա նավթ տեղափոխող տանկերը օվկիանոսում մանևրում է արդեն երեք շաբաթ։ Եվս չորս շաբաթ է, ինչ նա լքել է թուրքական Ջեյհան նավահանգիստը։ Նավը նշում է, որ սպասում է պատվերների։
Դատելով նստվածքից՝ 17.1 մետրից 15.9 մետր, տանկերի վրա առկա է ավելի քան 100 հազար տոննա ադրբեջանական նավթ։ Ըստ երևույթին, բեռի սեփականատերը չի կարողանում վաճառել խմբաքանակը, որի արժեքը կարող է կազմել մոտ 70 միլիոն դոլար։
Նավը Ջեյհանից դուրս է եկել հուլիսի 17-ին, որից հետո տերմինալի գործունեությունը աղտոտվածության հայտնաբերման պատճառով դադարեցվել է մինչև հուլիսի 23-ը։
Ինչպես ավելի վաղ հաղորդել էր EADaily-ն, իտալական Eni-ն հայտարարել է իր վերամշակման գործարաններում աղտոտված նավթի ստացման մասին, ապա ավստրիական OMV-ն և լեհական Orlen-ի չեխական ստորաբաժանումը հաստատել են քլորիդներով հումքի ներմուծումը, որը չի հասցրել հասնել նավթավերամշակման օբյեկտներ։ Ռումինիայում, իր հերթին, արտակարգ դրություն է մտցվել, քանի որ 90 հազար տոննա աղտոտված նավթի խմբաքանակը ստիպել է OMV Petrom-ին իր վերամշակման գործարանների համար հումք վերցնել երկրի ռազմավարական պաշարներից։
Բրիտանական BP ընկերությունը, որը Ադրբեջանում նավթի արտադրության և Բաքու-Թբիլիսի-Ջեյհան նավթամուղի օպերատորն է, հաստատել է անորակ նավթի առկայությունը։
«Գնահատման արդյունքները հաստատում են Ջեյհանի տերմինալի որոշ բաքերում օրգանական քլորիդների առկայությունը: Ձեռնարկվել են համապատասխան միջոցներ այդ բաքերը մեկուսացնելու համար, մինչդեռ բեռնումը շարունակվել է այն բաքերից, որոնք գնահատվել են որպես նորմալ չափանիշներին համապատասխանող», - AnewZ-ի եթերում ասել է BP Azerbaijan-ի հաղորդակցության տնօրեն Թամամ Բայաթլին:
Reuters–ը հայտնել է, որ ադրբեջանական նավթի գների զեղչերը հասել են չորս տարվա ամենաբարձր մակարդակին: Նշվում է, որ կարող է օգտագործվել ոչ ստանդարտ նավթ, բայց դրա համար այն խառնվում է որակյալ հումքի հետ այնպիսի համամասնությամբ, որ քլորիդների մակարդակը կտրուկ նվազի և համապատասխանի չափանիշներին:
Ռումինիայի իշխանությունները քննարկում են մի այնպիսի սցենար, որի դեպքում Ռուսաստանը կարող է մասնակից լինել ադրբեջանական նավթի քլորիդներով աղտոտմանը: Բուխարեստը պնդում է, որ արտակարգ իրավիճակը սպառնում է Եվրոպայի էներգետիկ անվտանգությանը: Միևնույն ժամանակ, փաստերը և փորձագետները պնդում են, որ պատճառը, ամենայն հավանականությամբ, տեխնիկական սխալն է եղել:
Նյութը հրապարակման պատրաստեց Կամո Խաչիկյանը
