Իսրայելի բանակը զորակոչում է մոտ 60 հազար պահեստազորայինների՝ ամբողջ Գազա քաղաքի գրավման առնչությամբ
ՄԻՋԱԶԳԱՅԻՆ
Իսրայելի բանակը հայտարարել է, որ զորակոչում է մոտ 60 հազար պահեստազորայինների՝ ամբողջ Գազա քաղաքի գրավման նախապատրաստական աշխատանքներին ընդառաջ, հաղորդում է BBC News-ն։
Ռազմական պաշտոնյան նշել է, որ պահեստազորայինները ծառայության կներկայանան սեպտեմբերին, և որ հարձակման համար մոբիլիզացված զորքերի մեծ մասը կլինի ակտիվ ծառայության մեջ։ Իսրայելի պաշտպանության բանակը հավելել է, որ զորքերն արդեն գործում են Զեյթուն և Ջաբալիա շրջաններում՝ նախապատրաստվելով այն ծրագրին, որը պաշտպանության նախարար Իսրայել Կացը հաստատել է երեքշաբթի և այս շաբաթվա վերջում կներկայացվի անվտանգության կաբինետին։
Կանխատեսվում է, որ Գազա քաղաքի հարյուր հազարավոր պաղեստինցիներին կհրամայվի տարհանվել և ուղղվել դեպի հարավային Գազայի ապաստարաններ։
Իսրայելի դաշնակիցներից շատերը դատապարտել են ծրագիրը, իսկ Ֆրանսիայի նախագահ Էմանուել Մակրոնը չորեքշաբթի զգուշացրել է, որ այն «կարող է միայն աղետի հանգեցնել երկու ժողովուրդների համար և վտանգում է ամբողջ տարածաշրջանը ներքաշել մշտատև պատերազմի բոլորապտույտի մեջ»։
Կարմիր Խաչի Միջազգային Կոմիտեն (ԿԽՄԿ) իր հերթին հայտարարել է, որ հետագա տեղահանությունները և մարտերի ուժգնացումը «վտանգում են վատթարացնել արդեն իսկ աղետալի իրավիճակը» Գազայի 2,1 միլիոն բնակչության համար։
Իսրայելի կառավարությունը հայտարարել է ամբողջ Գազայի հատվածը գրավելու մտադրության մասին, երբ անցյալ ամիս ՀԱՄԱՍ-ի հետ հրադադարի և պատանդների ազատ արձակման վերաբերյալ անուղղակի բանակցությունները ձախողվեցին։ Միջնորդներ Կատարը և Եգիպտոսը փորձում են համաձայնության գալ հարձակումից առաջ և ներկայացրել են 60-օրյա հրադադարի և Գազայում պահվող 50 պատանդներից մոտ կեսի ազատ արձակման նոր առաջարկ, որը ՀԱՄԱՍ-ն ընդունել է երկուշաբթի։
Իսրայելը դեռևս պաշտոնապես չի արձագանքել, սակայն իսրայելցի պաշտոնյաները երեքշաբթի պնդել են, որ այլևս չեն ընդունի մասնակի գործարքը և կպահանջեն համապարփակ համաձայնագիր, որը կազատի բոլոր պատանդներին, որոնցից, ենթադրաբար, միայն 20-ն է դեռևս ողջ։
