Տղաներով վոլեյբոլ էին խաղում, գնացել է գնդակի հետևից ու խեղդվել․ նոր մանրամասներ՝ ողբերգական դեպքից

Երեկ՝ օգոստոսի 3-ին, Գեղարքունիքի մարզում ողբերգական դեպք էր տեղի ունեցել․ 16-ամյա տղան Սևանա լճում լողալիս խեղդվել է։

Oragir.News-ի տեղեկություններով՝ դեպքը տեղի է ունեցել Լճաշենի տարածքում գործող լողափերից մեկում։ Զոհված տղան Գեղարքունիքի մարզի Գավառհամայնքի Լանջաղբյուր գյուղի բնակիչ էր։

Մանրամասների համար Oragir.News-ը կապ հաստատեց Լանջաղբյուրի վարչական ղեկավար Վազգեն Նավոյանի հետ։ Վերջինս մեզ հետ զրույցում հայտնեց, որ պատանին մասնակցել է ծննդյան արարողության, որի ընթացքում էլ մի քանի տղաներով որոշել են ջրում վոլեյբոլ խաղալ։

«Որոշել են ջրում վոլեյբոլ խաղալ, ու գնդակը հեռու է գնացել։ Չնայած զգուշացման նշաններին, տղաները գնացել են գնդակի հետևից։ Երկու հոգով են եղել, հասել են մոտ 6 մետր խորության։ Մի տղային հաջողվել է փրկել, բայց մյուսին՝ ոչ»,- ասաց Նավոյանը։

Վարչական ղեկավարը նշեց նաև, որ տղան ընտանիքի միակ որդին չի եղել, ունեցել է երկու եղբայր։

Նա պատմեց նաև ընտանիքի ողբերգական նախապատմության մասին՝ ընդգծելով, որ այս կորուստը յուրովի է ծանրացնում ընտանիքի առանց այդ էլ ցավոտ ճակատագիրը․ «Քույրն իր տարիքի էր, արյան խնդրի պատճառով մահացել է։ Մայրը նույնպես մահացել է, երբ ինքը նոր էր ծնվել։ Երեխան ընդամենը երեք ամսական էլ չկար, երբ մնաց առանց մոր։ Չգիտեմ ինչ ասեմ»։