Գնդակոծություններ Ուկրաինայում. մեկ գիշերվա ընթացքում երկու մարդ զոհվել է, 15-ը՝ վիրավորվել

Այս գիշեր ռուսական զորքերը գնդակոծել են Ուկրաինայի երեք մարզեր։ Այս մասին իր տելեգրամյան ալիքում հայտնել է Դոնեցկի մարզային ռազմական վարչակազմի ղեկավար Վադիմ Ֆիլաշկինը, տեղեկացնում է DW-ն։

Նրա խոսքով՝ վերջին մեկ օրում ռուսական գնդակոծությունների հետևանքով զոհվել են Դոնեցկի մարզի երկու բնակիչ՝ Կոնստանտինովկա և Միռնոգրադ քաղաքներում։ Երեք մարդ վիրավորվել է Կրիմկի և Սվետլոե գյուղերում:

Խերսոնի մարզում վիրավորվել է ութ մարդ, այդ թվում՝ մեկ երեխա։ Վնասվել են երկու բազմահարկ շենք և 11 մասնավոր տուն, հայտնել է տեղի վարչակազմը։

Դնեպրոպետրովսկի մարզը ՌԴ զինված ուժերը ենթարկել են հրետանային գնդակոծման և հարվածային դրոնների հարձակման։ Այնտեղ վիրավորվել է չորս մարդ՝ երկու տղամարդ՝ 47 և 60 տարեկան, և երկու կին՝ 40 և 58 տարեկան, նշված է Դնեպրոպետրովսկի մարզային վարչակազմի հաղորդագրության մեջ։

Ուկրաինայի Զինված ուժերի Օդուժի տելեգրամյան ալիքում նշված է, որ հուլիսի 27-ի գիշերը ռուսական զինված ուժերը Ուկրաինայի տարածքի վրա հարձակվել են 83 անօդաչու թռչող սարքով։ «Թշնամին կիրառել է 83 հարվածային «Շահեդ» տիպի ԲՊԼԱ և տարբեր տեսակի իմիտացիոն դրոններ»,-ասված է հաղորդագրության մեջ:

Հաղորդվում է նաև, որ դրոնների արձակումներն իրականացվել են Օրյոլից, Կուրսկից, Միլլերովոյից, Շատալովոյից, Պրիմորսկո-Ախտարսկից և Գվարդեյսկոյից՝ գրավյալ Ղրիմում։ Ըստ ամփոփագրի՝ ուկրաինական հակաօդային պաշտպանության ուժերը կարողացել են խոցել 78 դրոն՝ Ուկրաինայի հյուսիսում, հարավում, արևելքում և կենտրոնում։