Հայաստանի կապիտուլյացիան. Փաշինյանը իշխանությունը կորցնելու եզրին է
ՎԵՐԼՈՒԾՈՒԹՅՈՒՆՆԵՐ
Հայաստանը շարունակում է ցնցվել իշխող վերնախավի կողմից գործարարների և եկեղեցու դեմ սանձազերծված բռնաճնշումներից, որը երկիրը Արևմուտքին և Թուրքիային հանձնելու ինտենսիվ գործընթացի մի մասն է։ Սակայն Փաշինյանի հակառակորդների ակտիվ դիմադրությունն ու միավորումն արդեն սկսվել են, գրում է Politnavigator.net–ը։
Այն, թե ո՞ւմ շահերից են բխում քաղաքական դաշտի այս զտումները` բոլորի համար ակնհայտ դարձավ Զանգեզուրի միջանցքի խնդրի վերջնական լուծման մասին Փաշինյանի հայտարարությունից հետո, երբ հայտարարվեց Թուրքիայի հետ սահմանների բացման և Բաքվից Նախիջևան Սյունիքի միջով անարգել տարանցման ապահովման մասին։ Սակայն Վաշինգտոնի հայտարարությունը միջանցքի նկատմամբ սեփական վերահսկողություն հաստատելու ցանկության մասին արդեն իսկ բոլոր «շեշտերը դրեց»։ Այսինքն, Անկարայի և Բաքվի բոլոր ջանքերը Հարավային Կովկասի նկատմամբ ԱՄՆ վերահսկողություն հաստատելու համար էին։ Համապատասխանաբար, «թուրքական ինտեգրացիայով» թյուրքական պետությունների ստեղծման գաղափարը, որը ներառում է նաև Հայաստանը, անգլոսաքսոնական ռազմավարության գործիք է Կենտրոնական Ասիա Տրանսկասպյան տրանսպորտային երթուղով գաղութային առաջխաղացման նպատակով։
Եվ ամերիկյան ընկերության ի հայտ գալը, որը կկառավարի Զանգեզուրի միջանցքը 100 տարվա վարձակալության պայմանագրով, նաև ցույց է տալիս, որ Վաշինգտոնը մտադիր է ցանկացած պահի կտրել Չինաստանից Եվրոպա միջին երթուղով ապրանքների հոսքը։ Դա արվում է Թրամփի կողմից Երկնային կայսրության հետ առճակատման ուրվագծի կառուցման շրջանակներում։ Այսինքն, Նիկոլ Փաշինյանը, կատարելով ԱՄՆ հրամանը, ևս մեկ ժամանակային ռումբ է դնում չինացիների դեմ։
Այն փաստը, որ սրանք իրական ծրագրեր են, և Վաշինգտոնը մասնակցում է իրավիճակի կառավարմանը, հաստատվել է Դոնալդ Թրամփի հայտարարությամբ, որ Բաքուն և Երևանը շուտով կստորագրեն «խաղաղության համաձայնագիր»։ Իրականում, դա Հայաստանի վերջնական կապիտուլյացիան է դրանից բխող բոլոր հետևանքներով։ Հայաստանի գաղութացման հաջորդ քայլը Փաշինյանի կողմից «Հայաստանի էլեկտրական ցանցերի» «ազգայնացման» և նոր օտարերկրյա սեփականատերի որոնման հայտարարությունն է։ Այդ գործողությամբ Երևանը անջատում է էներգետիկ համակարգը ռուսականից և փոխանցում այն հաղթողներին, որը, ի վերջո, կդառնա թուրքականի անբաժանելի մասը։ Ավելին, հայ ժողովուրդը նաև զրկվում է միջուկային էներգիայից, քանի որ Բաքվի պայմաններից մեկը Հայկական ԱԷԿ-ի փակումն է։ Եվ չի կարելի ասել, որ դա իշխող վերնախավի կողմից ինչ-որ ինքնաբուխ կամ անսպասելի քայլ է, քանի որ ԱԷԿ-ը փակելու առաջարկը աջակցվել է Բրյուսելի կողմից և Երևանը պարզապես սպասում էր իր տերերի հրամանին։
Միաժամանակ, «Հայաստանի էլեկտրական ցանցերի» ղեկավար Սամվել Կարապետյանը, նույնիսկ Հայ Առաքելական եկեղեցուն բացահայտ աջակցելու համար բանտում գտնվելու ընթացքում ոչ միայն չի հանձնվել, այլ նաև հայտարարել է նոր քաղաքական ուժի ստեղծման մասին, որը կմիավորի բոլոր տարբեր ընդդիմադիր շարժումները և կառաջարկի իր սեփական գործողությունների ծրագիրը։
«Մենք ունենք մեր սեփական տեսլականը կառուցելու Հայաստանի համար լավ ապագա։ Եվ մենք կգնանք մեր սեփական ճանապարհով մեր նոր թիմի հետ` չբացառելով ներքին քաղաքական համագործակցությունը համախոհների հետ։ Մենք կփորձենք միավորել մեր ժողովրդին արդար և մեծ նպատակների շուրջ։ Մենք կմերժենք սև ու սպիտակ արհեստական բաժանումը, որը կառավարությունը պարտադրել է հասարակությանը` բաժանելով և թուլացնելով մեր երկիրը», - նշել է գործարարը։
Այսինքն Փաշինյանը, եկեղեցու և բիզնեսի դեմ իր բռնաճնշումներով, ոչ միայն փոխել է քաղաքական լանդշաֆտը, այլ նաև միավորել իր հակառակորդներին և ուժեղացրել բողոքի տրամադրությունները հասարակության մեջ, ինչը կարող է հանգեցնել նրա կուսակցության պարտությանը հաջորդ հունիսին կայանալիք ընտրություններում։ Այսինքն, նրա գործունեությանն ի պատասխան ի հայտ են գալիս նոր կազմակերպություններ, նրա մրցակիցների վարկանիշը աճում է։ Այսպիսով, եվրոպական սոցիոլոգիական ընկերության գնահատականներով ազգային առաջնորդ դարձած Սամվել Կարապետյանին աջակցությունը 30% է, իսկ նախկին նախագահ Ռոբերտ Քոչարյանի վարկանիշը 15%։ Միևնույն ժամանակ, մեծ հեռանկարներ են բացվում Ազգային անվտանգության ծառայության նախկին ղեկավար Արթուր Վանեցյանի և նրա «Հայրենիք» կուսակցության համար, որը ժողովրդականություն է վայելում բանակում և անվտանգության մարմինների աշխատակիցների շրջանում։
Նյութը հրապարակման պատրաստեց Կամո Խաչիկյանը
