«Փաշինյանները հեռանում են, բայց Հայաստանը մնում է». Կարտապոլովը Երևանի ՀԱՊԿ-ից դուրս գալու մասին
ՔԱՂԱՔԱԿԱՆՈՒԹՅՈՒՆ
Երևանի Հավաքական անվտանգության պայմանագրի կազմակերպությունից դուրս գալու հնարավոր որոշումը չի համապատասխանում հայ ժողովրդի շահերին, ասել է ՌԴ Պետդումայի պաշտպանության կոմիտեի նախագահ Անդրեյ Կարտապոլովը։ Նա նշել է, որ նման որոշումները չեն կարող կայացվել միայն կառավարության ղեկավարի կողմից, գրում է news.ru-ն։
«Փաշինյանը, իհարկե, այժմ Հայաստանի ղեկավարն է, բայց այնտեղ դեռ կա հայ ժողովուրդ։ Եվ հայ ժողովրդի համար ՀԱՊԿ-ից Հայաստանի դուրս գալը բացարձակապես առաջնահերթություն չէ։ Հասկանո՞ւմ եք։ Փաշինյանները գալիս և գնում են, բայց Հայաստանը մնում է։ Հետևաբար, եկեք հանգիստ արձագանքենք դրան՝ նման քաղաքական գործիչների հայտարարություններին»,- ասել է Կարտապոլովը։
Նա նաև ընդգծել է, որ ՀԱՊԿ-ից Հայաստանի դուրս գալու որոշումը պետք է համաձայնեցվի հանրապետության խորհրդարանի կողմից։ Նրա խոսքով անհրաժեշտ է հասկանալ, որ միջազգային պայմանագրերի վերաբերյալ ցանկացած որոշում պահանջում է բարդ ընթացակարգային գործընթացներ, այդ թվում ֆինանսավորման և համաձայնագրերի երկարաձգման հարցեր։
Պատգամավորը հատուկ ուշադրություն է դարձրել Հայաստանում ռուսական ռազմաբազայի կարգավիճակին։ Նա բացատրել է, որ օբյեկտը գործում է երկրների միջև կնքված երկկողմ համաձայնագրի, այլ ոչ թե ՀԱՊԿ շրջանակներում կնքված պայմանագրի հիման վրա։
«Հետևաբար, այն (բազան) կշարունակի այնտեղ առաջադրանքներ կատարել այնքան ժամանակ, քանի դեռ դրա անհրաժեշտությունը կա», — եզրափակել է խորհրդարանականը։
Նյութը հրապարակման պատրաստեց Կամո Խաչիկյանը
