Կհաջողվի՞ ապացուցել իր եզակիությունը. «Փաստ»

«Փաստ» օրաթերթը գրում է.

radiokp.ru–ն գրում է, որ քաղաքագետ, կովկասագետ Արթուր Աթաևը «Կոմսոմոլսկայա պրավդա» ռադիոյի եթերում մեկնաբանել է ռուս գործարար և «Տաշիր» ընկերության նախագահ Սամվել Կարապետյանի՝ «քաղաքական ուժ» ստեղծելու մտադրության մասին հայտարարությունը։ Նրա խոսքով, լինելով Ռուսաստանի քաղաքացի՝ Կարապետյանը փաստացի հայ գործարար է և բավականին տպավորիչ ներկայացվածություն ունի Հայաստանի տնտեսությունում։ «Նա իսկապես ազդում է տնտեսական գործընթացների վրա, ուստի նրա «վերափոխումը» լիովին ողջամիտ է, շատ առումներով արդարացված նույնիսկ հայկական քաղաքականության ներկայիս պայմաններում։ Այնպես որ, այստեղ հակասություններ չկան, հատկապես որ հենց Նիկոլ Փաշինյանն է իր ձեռքերով, իր բերանով նրան դարձրել քաղաքական գործիչ։ Հարցն այն է, որ կուսակցություն կարելի է ստեղծել, բայց դեռ հարց է, թե ո՞վ կլինի առաջին եռյակում, ո՞վ կլինի լոկոմոտիվը, ո՞վ կլինի մարմնավորողը։ Նայեք նմանատիպ նախադեպերին հարևան Վրաստանում։ Իվանիշվիլին իրականում Ռուսաստանի քաղաքացի էր, նա փաստացի ռուսաստանցի խոշոր գործարար էր, բայց նա կառուցեց ամենաուժեղ քաղաքական ուժը՝ «Վրացական երազանքը», որը իշխանության գլուխ է երկար տարիներ։ Նմանատիպ իրավիճակ է հիմա տեղի ունենում նաև Մոլդովայում, երբ Մոսկվա աքսորված քաղաքական գործիչները քաղաքական ուժ են ստեղծում», - ասել է նա։

Աթաևը նշել է, որ Կարապետյանը գնում է վա–բանկ լավ տրորված ճանապարհով, որը, որպես ամբողջություն, արդեն իսկ արմատներ ունի տարածաշրջանում։ «Տեսեք, Էրդողանը բանտում էր, Փաշինյանը իշխանությունների կողմից ճնշված խորը ընդդիմություն էր, Գամսախուրդիան խորհրդային տարիներին հալածված ընդդիմադիր էր։ Նախկին ԽՍՀՄ հանրապետությունների համար զարմանալի չէ, երբ ընդդիմությունը դառնում է դիմություն, իսկ հակաէլիտան՝ էլիտա։ Կարծում եմ, որ Կարապետյանը գիտակցված քայլ է արել, այլ բան է, որ նրա սկզբնական հայտարարությունները լուրջ քաղաքական վստահություն չեն ներշնչում, քանի որ նա ցուցադրաբար հեռավորություն է պահում գործող ընդդիմությունից, ասում է, որ հարգում է բոլոր ընդդիմադիր ուժերին, բայց հռչակում է իր սեփականը։ Եթե նա մոտ ապագայում չապացուցի իր եզակիությունը, ապա դա կլինի տասնյակ նոր ընդդիմադիր նախագծերից ընդամենը մեկը։ Հնարավոր է, որ խաղադրույք կատարվի բիզնես էլիտայի վրա, Հայ առաքելական եկեղեցու հետ փոխազդեցության մեջ այդ խաղադրույքը կարդարացվի։ Ներկայում Առաքելական եկեղեցին, որն ունի դարավոր պատմական արմատներ, բողոքի հիմնական շարժիչ ուժն է, և այդ ուժը հսկայական ֆինանսական ներարկումների կարիք ունի։ Ես, անկեղծ ասած, կասկածներ ունեմ, որ Կալուգայի գրանցմամբ անձը կարող է դառնալ նշանակալի դեմք հստակ արևմտյան կողմնորոշմամբ հայկական ընտրազանգվածի մոտ, որտեղ, այսպես ասած, ռուսամետ տրամադրությունները կազմում են ընդհանուրի 5-20 %-ը», - բացատրել է փորձագետը։

Մանրամասները՝ «Փաստ» օրաթերթի այսօրվա համարում