Մինչև հուլիսի վերջ Փաշինյանը «կուլակաթափ կանի» կալանավորված միլիարդատիրոջը
ՔԱՂԱՔԱԿԱՆՈՒԹՅՈՒՆ
ՀՀ խորհրդարանն առաջին ընթերցմամբ ընդունել է օրինագիծ, որը թույլ է տալիս ազգայնացնել «ՀԷՑ»-ը, որը պատկանում է կալանավորված օլիգարխ Սամվել Կարապետյանին, իսկ վարչապետ Նիկոլ Փաշինյանը հույս ունի հուլիսի վերջին իր ձեռքը վերցնել ՀԷՑ-ի վերահսկողությունը, գրում է ng.ru–ն:
Միևնույն ժամանակ, ՀՀ քննչական կոմիտեն խուզարկություն է անցկացրել «Տաշիր»-ի գրասենյակում: Գործակալությունն ընդգծել է, որ օպերատիվ գործողությունները կապված չեն պետական հեղաշրջման կոչ անելու գործի հետ: Կառավարամետ լրատվամիջոցները հայտնել են, որ նախնական քննություն է ընթանում առանձնապես խոշոր չափերով փողերի լվացման և առանձնապես խոշոր չափերով հարկերի, տուրքերի կամ այլ վճարումների չվճարման հատկանիշներով հարուցված քրեական գործի վերաբերյալ:
«Ինչպես երևում է, ՀԷՑ-ը, այնուամենայնիվ, ազգայնացվելու է։ Իշխանությունների գործողությունների արագությունը ցույց է տալիս, որ Փաշինյանի կառավարությունը վաղուց է պատրաստվել դրան։ Հնարավոր է ընկերությունը որոշ ժամանակ պետական լինի, իսկ հետո մասնավորեցվի։ Կարելի է ենթադրել, որ հաջորդ սեփականատերը կլինի Խաչատուր Սուքիասյանը, որին նաև անվանում են «Փաշինյանի դրամապանակ»»,-ng.ru-ի հետ զրույցում ասել է Կովկասի ինստիտուտի գիտաշխատող Հրանտ Միքայելյանը։ Ինչ վերաբերում է ներդրումային միջավայրին, ապա այստեղ իրավիճակը, փորձագետի տեսանկյունից, երկիմաստ է թվում։ Մասնավորապես, շատերը տեղի ունեցողը դիտարկում են որպես ռուս ներդրողի դեմ գործողություն, ուստի արևմտյան բիզնեսներն անհանգստանալու պատճառ չունեն։ «Մենք դժվար թե տեսնենք ՀԷՑ-ի ազգայնացման որևէ լուրջ ազդեցություն երկրի ներդրումային միջավայրի վրա, բայց կարող ենք համաձայնվել այն բանի հետ, որ դրանից ներդրումային միջավայրը չի բարելավվի», - կարծիք է հայտնել Միքայելյանը։
Նյութը հրապարակման պատրաստեց Կամո Խաչիկյանը
