«Apple»-ը հրապարակել է պատմության մեջ 500 ամենապոպուլյար երգերի ցանկը

«Apple Music» սթրիմինգային ծառայությունն իր 10-ամյակի առթիվ հրապարակել է հարթակի պատմության մեջ 500 ամենահայտնի երգերի վարկանիշային աղյուսակը: Ցուցակը գլխավորել է բրիտանացի արտիստ Էդ Շիրանի «Shape of You» թրեքը: Այս մասին հայտնել է The Hollywood Reporter (THR)-ը:

Շիրանի՝ 2017 թվականին թողարկված հիթը, ըստ մամուլի հաղորդագրության, 1800 օր զբաղեցրել է առնվազն մեկ երկրի փոփ չարթերի առաջին հորիզոնականը: Վարկանիշում երկրորդ տեղը զբաղեցրել է The Weeknd-ի «Blinding Lights» երգը, իսկ երրորդը՝ ռեփեր Դրեյքի «God's Plan»-ը:

Առաջատար տասնյակում են եղել նաև Post Malone–ի երկու ստեղծագործություններ՝ «Sunflower»-ը և «rockstar»-ը: «God's Plan»-ից բացի, Դրեյքի «One Dance» և «No Guidance» երգերը նույնպես ընդգրկվել են լավագույն տասնյակում: «Էլիտար ցուցակը» լրացնում են Թրևիս Սքոթի «Sicko Mode» հիթը, Էդ Շիրանի մեկ այլ «Perfect» երգը և Բիլլի Այլիշի «bad guy» երգը։

Ընդհանուր առմամբ, Դրեյքը լավագույն 500-ում ամենաշատ ներկայացված արտիստն է՝ 27 երգով: Կանանց շրջանում ռեկորդակիրը Թեյլոր Սվիֆթն է, որի 14 երգ ընդգրկված են վարկանիշային աղյուսակում: Հետաքրքիր է, որ Apple Music-ի վարկանիշը տարբերվում է Spotify չարթից, որտեղ «Blinding Lights»-ը զբաղեցնում է առաջին տեղը, իսկ «Shape of You»-ն՝ երկրորդը։