Ռոդենի՝ ավելի քան 100 տարի կորած համարվող քանդակը վաճառվել է շուրջ 1 միլիոն դոլարով

Ֆրանսիացի քանդակագործ Օգյուստ Ռոդենի «Հուսահատություն» քանդակը, որն ավելի քան 100 տարի համարվում էր անհետ կորած, վաճառվել է Ֆրանսիայի Վիլանդրի ամրոցում կայացած Rouillac աճուրդում: Գնորդը 982,000 դոլար է վճարել փոքր՝ 28,5 սմ բարձրությամբ մարմարե արձանիկի համար, հայտնում է myweekend.ru կայքը:

Նստած մերկ կնոջ ֆիգուրը Ռոդենը ստեղծել է 1892-1893 թվականներին, երբ աշխատում էր «Դժոխքի դարպասներ» քանդակագործական խմբի վրա։ Խումբը նախատեսված էր Փարիզի նոր դեկորատիվ արվեստների թանգարանի մուտքի դարպասը զարդարելու համար, և դրա կոմպոզիցիան հիմնված էր Դանթեի «Աստվածային կատակերգություն» ստեղծագործության սյուժեի վրա։

Աչձանիկը 1906 թվականին աճուրդում վաճառվել էր 4100 ֆրանկով, որից հետո դրա հետքը կորել էր։ Վերջին տարիներին այն որոնում էին ինչպես Rouillac  աճուրդի տան մասնագետները, այնպես էլ Ռոդենի աշխատանքներն ուսումնասիրող «Կոմիտ Ռոդեն» կազմակերպությունը։ Հաջողությունն աճուրդի տան կողմն էր. նրանց հետ կապ է հաստատել մի ընտանիք, որի տանը այս քանդակը երկար տարիներ դրված էր եղել դաշնամուրի վրա։ Եվ այս ամբողջ ընթացքում սեփականատերերը հավատում էին, որ այն կրկնօրինակ է:

Հազվագյուտ իրըստանալով՝ մասնագետները մի քանի շաբաթ ուշադիր ուսումնասիրել են և եկել եզրակացության, որ այն իսկապես հայտնի քանդակագործի աշխատանքն է։ Այժմ այն ​​ներառված է Օգյուստ Ռոդենի աշխատանքների պաշտոնական կատալոգում, և համապատասխան վկայականը տրամադրվել է քանդակի նոր սեփականատիրոջը։