«Սարգիս Ծատուրյան. մենք Հայաստանը կդարձնենք անկախ ազգային պետություն»
ՔԱՂԱՔԱԿԱՆՈՒԹՅՈՒՆ
Հայաստանը կորցրել է իր սուբյեկտիվությունն արտաքին քաղաքականության մեջ և հայտնվել է այնպիսի երկրի դիրքում, որը ոչ մի հետաքրքրություն չի ներկայացնում ո՛չ Միացյալ Նահանգների, ո՛չ էլ Ռուսաստանի համար։ Այդ մասին հայտարարել է «Աշխարհաժողով» շարժման հիմնադիր Սարգիս Ծատուրյանը, գրում է realtribune.ru–ն։ Իրանի հետ ռազմավարական դաշինքի մասին խոսելով Ծատուրյանն ասել է, որ Հայաստանի բոլոր հետխորհրդային կառավարությունների հիմնական սխալներից մեկն Իրանի հետ վստահելի հարաբերությունների խզումն է եղել. «Մենք որևէ իրական ռազմավարական երկխոսություն չենք կառուցել Իրանի հետ։ Հայաստանի բոլոր ղեկավարները, սկսած առաջին նախագահից, ամեն ինչ արել են, որպեսզի Իրանը որքան հնարավոր է հեռու մնա մեզանից»։ Նա նշել է, որ Իրանը բազմիցս է առաջարկել դաշնակցային փոխգործակցության ձևաչափեր, այդ թվում անվտանգության ոլորտում, սակայն հայկական կողմն անտեսել է դրանք. «Եթե դուք դեմ առ դեմ խոսեք ազդեցիկ իրանցիների հետ, նրանք կներկայացնեն մեզ առաջարկած ամեն ինչի ցանկը, որոնք մենք կամ մերժել ենք, կամ չենք համաձայնվել»։
Ծատուրյանն ընդգծել է, որ ներկայիս պայմաններում, երբ սիրիացի և իրաքցի քրդերը կարող են կորցնել ԱՄՆ աջակցությունը, հատկապես կարևոր է Թեհրանի հետ միասնական գիծ կառուցել դաշնակից ժողովուրդներին պաշտպանելու և տարածաշրջանը կայունացնելու համար։ Խոսելով ԱՄՆ-ի և Իսրայելի դիրքորոշման վերաբերյալ Ծատուրյանն ուղղակիորեն մեղադրել է Դոնալդ Թրամփի վարչակազմին Արցախի և Հայաստանի դեմ պատերազմը խրախուսելու մեջ. «Թրամփի վարչակազմը պատերազմին համաձայնություն տվեց ոչ թե որովհետև նրանք հայատյաց են, այլ որովհետև մենք սուբյեկտիվություն չենք ներկայացնում։ Նրանց համար մենք ոչ ոք ենք»։ Նա ընդգծել է, որ ԱՄՆ-ը գործում է բացառապես իր շահերի շրջանակներում ձգտելով թուլացնել Իրանը տարածաշրջանային հակամարտությունների միջոցով. «Նրանք չեն թաքցնում այն փաստը, որ մեզ օգտագործում են Իրանի վրա ճնշում գործադրելու համար։ Նրանց համար Ուկրաինան և Հայաստանը գործիք են ուժային մյուս կենտրոնների վրա ճնշում գործադրելու համար»։
Միաժամանակ, Ծատուրյանը նշել է, որ Իսրայելը շարունակում է ընդլայնել իր ազդեցությունը Վաշինգտոնում աջակցություն փնտրելով Իրանի դեմ իր գործողությունների համար. «Նեթանյահուի և նրա շրջապատի ազդեցությունը Վաշինգտոնի վրա հրեական շրջանակների միջոցով ակնհայտ է։ Ամերիկացիները չեն մտահոգվում Իրանի միջուկային զենքից, նրանք վախենում են միջուկային տեխնոլոգիաների զարգացման շնորհիվ ապահովվող տնտեսական աճից»։ Հայաստանում ստեղծված իրավիճակի վերաբերյալ Ծատուրյանը կոշտ գնահատական է տվել Երևանի քաղաքական կշռին. «Մեր քաղաքական ազդեցությունը Մոսկվայում զրոյական է, որովհետև մենք չենք աշխատում։ Իսկ Իսրայելը գործում է Վաշինգտոնում և ստանում է այն, ինչ ուզում է»։
Նա նաև ասել է, որ Հայաստանն Իրանի և Մերձավոր Արևելքի համար աշխարհաքաղաքական պայքարում հայտնվել է «մուրճի ու սալի արանքում»։ Նրա խոսքով ԱՄՆ-ի և Մեծ Բրիտանիայի նպատակն է Իրանին որպես լոգիստիկ կենտրոն շրջափակել, և դա ավտոմատ կերպով Հայաստանին ներքաշում է ուրիշի պատերազմի մեջ. «Մենք կանգնած ենք անդունդի եզրին։ Հարցն իր հողի վրա հայի ֆիզիկական գոյատևումն է։ Ես անձամբ պատրաստ եմ անել ամեն ինչ ապահովելու իմ ժողովրդի ապրելու, երեխաներ ունենալու և նոր սերունդներ դաստիարակելու իրավունքը»։
Նյութը հրապարակման պատրաստեց Կամո Խաչիկյանը
