Փաշինյանը ռեպրեսիաներ է պատրաստում հոգևորականների դեմ
ՎԵՐԼՈՒԾՈՒԹՅՈՒՆՆԵՐ
Հայ առաքելական եկեղեցու դեմ Նիկոլ Փաշինյանի և գործող իշխանությունների սանձազերծած արշավը լուրջ խժդժություններ է առաջացրել նաև ուժային համակարգում։ Մարդիկ տասնամյակներ շարունակ աշխատել են ԱԱԾ-ում, ոստիկանությունում, նախընտրում են լքել իրենց աշխատավայրերը, քանի որ իրավապահներին հստակ հրահանգ է տրված գործողություններ սկսել բարձրաստիճան հոգևորականների դեմ։
Ընդհուպ, մեր տեղեկություններով խոսքը գնում է բարձրաստիճան հոգևորականների կալանավորման, ձերբակալման վերաբերյալ, ընդ որում, թիրախում Ամենայն Հայոց Կաթողիկոսն է։
Նիկոլ Փաշինյանն ինքը չի էլ հերքում, որ ուժայիններին հանձնարարել է կոմպրոմատներ գտնել բարձրաստիճան հոգևորականների դեմ, այժմ էլ իրավապահ համակարգին հստակ հանձնարարություն է տրված։ Ոոստիկանությունում սկսել են խոսել, որ արդեն նախկին ոստիկանապետ Արամ Հովհաննիսյանին ազատել են այս պատճառով։
Ոստիկանապետը, որ նվիրվածությամբ ծառայում էր Փաշինյանին, երկընտրանքի առաջ է կանգնել, նրան ուղիղ հարց են տվել, որ եթե ակցիաներ սկսեն բարձրաստիճան հոգևորականների դեմ, փորձեն ձերբակալել կամ կալանավորել, արդյոք պատրաստ կլինի՞ ղեկավարել նման գործողությունները, և Արամ Հովհաննիսյանն ուղիղ պատասխան Փաշինյանին չի տվել։ Դրանից հետո էլ ազատվել է աշխատանքից, իսկ նոր ոստիկանապետ նշանակվել է Լոռու մարզպետ, համոզված նիկոլական Արամ Ղազարյանը։
Այժմ գործող իշխանությունները ռեպրեսիաներ են պատրաստում հոգևորականների դեմ, ուստի իրավապահ համակարգում ներքին խռովություն է առաջացել, վերջին օրերին կադրային արտահոսք է սկսվել, շատերը չեն ցանկանում թաթախվել այս վերջնական ամոթալի և կեղտոտ արշավի մեջ։
Աննա Էլիզբարյան
