Ինչո՞ւ է հրաժարական տվել Վաղարշապատի քաղաքապետը

Վաղարշապատի համայնքապետ Դիանա Գասպարյանը երեկ հայտնել է հրաժարական տալու իր մտադրության մասին։ Գասպարյանը հրաժարականը բացատրել է անձնական խնդիրներով, մասնավորապես, պնդել, թե ուզում է ավելի շատ ժամանակ տրամադրել ընտանիքին ու երեխային։ «Դժվար որոշում եմ կայացրել կյանքիս այս փուլում ինձ նվիրել ընտանեկան հանգիստ կյանքին, երեխայիս դաստիարակությանը, ընտանիքիս ընդլայնմանը, հետևաբար առաջիկայում վայր եմ դնելու մանդատս որպես Վաղարշապատ համայնքի ավագանու անդամ ու այլևս չեմ զբաղեցնելու համայնքի ղեկավարի պաշտոնը»,- նշել էր նա։

Գասպարյանի անունը վերջին շրջանում հայտնվել էր լրատվամիջոցների ուշադրության կենտրոնում էջմիածնի բենզալցակայաններից մեկում տեղի ունեցած սպանության և կոռուպցիոն մի քանի գործարքների հետ։ Մամուլն էլ գրել էր, որ «Քաղաքացիական պայմանագրի»՝ այս ամսվա սկզբին կայացած վարչության նիստում նաև Դիանա Գասպարյանի պաշտոնավարման հարցն է քննարկվել։

Ընտանիքին նվիրվելու պատճառաբանությունն անգամ ՔՊ-ականների մոտ է քմծիծաղ առաջացնում։ ԱԺ խմբակցության քարտուղարն այսօր ակնարկել է, որ Վաղարշապատի համայնքապետը հրաժարական է տվել ոչ թե ընտանիքին նվիրվելու, այլ կոռուպցիոն գործի պատճառով։ «Գլոբալ կոնտեքստում` անկախ մարդու անուն–ազգանունից, քաղաքական պատկանելիությունից, եթե որևէ մեկը ներգրավված կլինի որևէ կոռուպցիոն, հովանավորչական գործարքի մեջ, պատժվելու է օրենքի ողջ խստությամբ, եթե հատկապես լինի «Քաղաքացիական պայմանագիր» կուսակցության թիմից»,– ասել էր Արթուր Հովհաննիսյանը։

Մեր տեղեկություններով, խնդիրը ոչ այնքան կոռուպցիոն գործարքներն են, որքան այն, որ Դիանա Գասպարյանը առաջիկա ընտրություններին չունի բավարար լծակներ իշխող ուժի համար քվեներ ապահովելու, ուստի ՔՊ-ն մի ձեռքով երկու ձմերուկ է ուզում բռնել՝ Վաղարշապատում ավելի հարմար և հավատարիմ մեկին նշանակել, հանրության էլ համոզել, թե պայքարում են կոռուպցիայի դեմ։

Էլիզա Գրիգորյան