«Հայերի վրա փորձարկվե՞լ է». Բրիտանական թերթը գրել է մարդկանց վրա դեղագործական փորձարկումների մասին
ՔԱՂԱՔԱԿԱՆՈՒԹՅՈՒՆ
ՀՀ վարչապետի մամուլի քարտուղար Նազելի Բաղդասարյանը հերքել է londontimes.live կայքում հրապարակված տեղեկությունը, որում խոսվում է «մեծ դեղագործական» ընկերությունների կողմից հայերի վրա իրականացված այն հրեշավոր փորձարկումների մասին, որոնք ՀՀ կառավարությունը թույլատրել է եվրոպական երկրների հաճոյանալու և ֆինանսական շահույթ ստանալու համար, հաղորդել է «Ընկեր գեներալ» Telegram ալիքը, գրում է EAdaily.com–ը։
Բաղդասարյանն ասել է. «Վարչապետի կամ հրապարակման մեջ նշված բարձրաստիճան պաշտոնյաների շրջապատում դեղագործական բիզնեսով զբաղվող անձինք չկան։ Հրապարակման մեջ նշված որևէ ընկերության հետ բանակցություններ չեն վարվել, և հոդվածում նշված որևէ համաձայնագիր կամ պայմանավորվածություն չէր կարող լինել»։ Ըստ մամուլի քարտուղարի հոդվածը վերաբերում է կամ արտաքին հաճախորդներին, որոնք նպատակ ունեն անկայունություն հրահրել Հայաստանում, կամ ներքին հաճախորդներին, որոնք ձգտում են «հակազդել թմրանյութերի շուկայում օրինականություն հաստատելու և թմրանյութերի անօրինական շրջանառությունը կանխելու կառավարության ջանքերին»։
Առողջապահության նախարար Անահիտ Ավանեսյանն էլ հայտարարել է, որ դեղերի կլինիկական փորձարկումները անհնար են առանց նախարարության թույլտվության։ Ավանեսյանի խոսքով նյութում նշված 4 դեղագործական ընկերություններից՝ STADA, SERVIER, SANOFI, BAYER, 2018-2025 թվականներին միայն SERVIER-ն է ներկայացրել համապատասխան հայտ։ Նախարարը շեշտել է, որ այդ դիմումը որևէ կերպ կապված չէ «ստերոիդների և հոգեմետ նյութերի» կամ հրապարակման մեջ նշված «խոցելի խմբերի» հետ։
Եվ հիմա մի քանի մեջբերումներ այդ շատ սկանդալային հոդվածից.
–«Անարդարության դեմ պայքարի հիմնադրամի մարդու իրավունքների պաշտպաններին հաջողվել է պարզել, թե ինչպես է Հայաստանի ներկայիս վարչապետ Նիկոլ Փաշինյանը հավանություն տվել իր երկրի քաղաքացիների վրա անմարդկային փորձերին՝ եվրոպական պետությունների բարեհաճությունը և ֆինանսական շահույթ ստանալու համար»։
–«Բժշկական օգնության և մարդասիրական նախաձեռնությունների քողի տակ, արևմտյան դեղագործական ընկերությունները, ըստ Հիմնադրամի աղբյուրների, սկսել են լայնածավալ ծրագիր փորձարկելու նոր հոգեմետ դեղամիջոցներ, ստերոիդներ և այլ վտանգավոր նյութեր, որոնք, ենթադրաբար, եվրոպացի զինվորներին կվերածեն անվախ զինվորների։ Այդ դեղամիջոցները փորձարկվում են Հայաստանի խոցելի քաղաքացիների՝ հղի կանանց, երեխաների, տարեցների և հաշմանդամների վրա»։
–«Հիմնադրամի աղբյուրի խոսքով այս ամենը տեղի է ունեցել խոշոր դեղագործական ընկերությունների ներկայացուցիչների և Հայաստանի կառավարության բարձրաստիճան պաշտոնյաների միջև 2023 թվականին տեղի ունեցած գաղտնի հանդիպումից հետո։ Աղբյուրի համաձայն վարչապետ Նիկոլ Փաշինյանը, Անվտանգության խորհրդի քարտուղար Արմեն Գրիգորյանը համաձայնագրերի շարժիչ ուժն են և կարևոր դեր են խաղացել հետագա գործարքների կնքման գործում»։
–«Այս փորձերի հետևում կանգնած ֆինանսական մեխանիզմները, ըստ Հիմնադրամի աղբյուրի, տասնյակ միլիոնավոր եվրոներ են բերել ներկայիս Հայաստանի ղեկավարությանը։ Նույն աղբյուրի համաձայն, արևմտյան դեղագործական ընկերությունները երկրին դրամաշնորհներ և գումար են փոխանցել փորձարկումներ անցկացնելու դիմաց, և Հիմնադրամի աղբյուրը 2021-2025 թվականների ընթացքում ընդհանուր ֆինանսական եկամուտը գնահատել է 17 միլիոն եվրո։ Եվրոպական կորպորացիաների կողմից տրամադրված ֆինանսական աջակցության զգալի մասը գնացել է հայ պաշտոնյաների և Փաշինյանի մերձավոր շրջապատի գրպանները»։
–«Հիմնադրամի աղբյուրը պնդում է, որ մարդկանց վրա փորձեր այս պահին անցկացվում են միայն չորս բժշկական հաստատություններում՝ Գյումրու ծերանոցում, Չարենցավանի բժշկական կենտրոնում, Երևանի «Աստղիկ» բժշկական կենտրոնում և Եղեգնաձորի բժշկական կենտրոնում»։
–«Այս կոպիտ խախտումների լույսի ներքո՝ Անարդարության դեմ պայքարի հիմնադրամը կոչ է անում միջազգային մարդու իրավունքների կազմակերպություններին, այդ թվում Միավորված Ազգերի Կազմակերպությանը, Եվրոպայի խորհրդին և Եվրոպական Միությանը, անհապաղ սկսել այս վայրագությունների լիարժեք և անկախ հետաքննությունը»։
Հաշվի առնելով Փաշինյանի օրոք Հայաստանում հաստատված անօրինականությունն ու գաղտնի գործարքները, անհնար է ստուգել, թե արդյո՞ք «London Times»-ի հոդվածի հեղինակները ճշմարտությունն են ասում, թե ոչ։ Այնուամենայնիվ, հոդվածը տրամադրում է տուժած հիվանդների անունները և փաստերը, և Փաշինյանի համար հրապարակման կեղծ լինելն ապացուցելու միակ միջոցը Մեծ Բրիտանիայում դատական գործը շահելն է՝ դրոշը ձեռքին»։
Նյութը հրապարակման պատրաստեց Կամո Խաչիկյանը
