Խոշոր վթար՝ Երևանում
ՀԱՍԱՐԱԿՈՒԹՅՈՒՆ
Այսօր՝ մայիսի 5-ին, ավտովթար է տեղի ունեցել Երևանում: Ժամը 12:20-ի սահմաններում Սարալանջի փողոցում բախվել են Երևանի բնակիչներ 24-ամյա Սամվել Օրդուխանյանի վարած «BMW» մակնիշի և 33-ամյա Մհեր Սարգսյանի վարած «BMW X3» մակնիշի ավտոմեքենաները:
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով, ըստ նախնական տեղեկությունների, բարեբախտաբար տուժածներ չկան:
Դեպքի վայր են ժամանել ՀՀ ներքին գործերի նախարարության ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի պարեկները՝ գումարտակի հրամանատարի տեղակալ Կարեն Ավետիսյանի, վաշտի հրամանատարի տեղակալ Տիգրան Խուդանյանի գլխավորությամբ:
Վարորդները ենթարկվել են սթափության փորձաքննության, եղել են սթափ:
Ըստ նախնական տեղեկությունների՝ վթարի պատճառը եղել է Ս. Օրդուխանյանի վարած «BMW»-ում առաջացած անսարքությունը, ինչի հետևաքով վարորդը չի կարողացել կառավարել, դուրս է եկել հանդիպակաց երթևեկելի գոտի, բախվել «BMW X3»-ին, ապա առաջ ընթացել, բախվել ճանապարհի եզրին տեղադրված երկաթե թիթեղին, կոտրել այն և մասամբ հայտնվել փոսում:
Վթարի փաստով ՊԾ Երևան քաղաքի գնդի 2-րդ գումարտակում փաստաթղթեր են ձևակերպվում:
Մինչ պարեկների դեպքի վայր ժամանելը՝ որոշ մարդիկ փորձել են փոսում հայտնված «BMW»-ի համարանիշները հանել, սակայն տեսնելով պարեկներին՝ հրաժարվել են այդ մտադրությունից:
