Սերգեյ Կիրիենկոն դարձել է Հայաստանի հետ հարաբերությունների համակարգողը
ՔԱՂԱՔԱԿԱՆՈՒԹՅՈՒՆ
Կրեմլի ներքին քաղաքականության բլոկը նոր խնդիրներ ունի, պարզել է vedomosti.ru–ն։ Նախագահի վարչակազմի ղեկավարի առաջին տեղակալ Սերգեյ Կիրիենկոն և նրա ենթակայության տակ գտնվող գերատեսչությունների աշխատակիցները սկսել են աշխատել Հայաստանի թեմայով: Այդ մասին vedomosti.ru-ին հայտնել են դաշնային չորս պաշտոնյաներ և նախագահի վարչակազմի հետ աշխատող երկու զրուցակիցներ։ Այդ ֆունկցիոնալությունը Կրեմլի ներքին քաղաքականության բլոկին է փոխանցվել աշխատակազմի ղեկավարի տեղակալ Դմիտրի Կոզակից։
Ավելի վաղ Կիրիենկոյին հանձնարարվել էր արտաքին ուղղությամբ այլ աշխատանքներ։ Մասնավորապես, նա և իր աշխատակազմը պատասխանատու էին Աբխազիայի, Հարավային Օսիայի, Մոլդովայի հարցերում։ Ամեն դեպքում, սա, առաջին հերթին, նշանակում է աշխատել նախագահի շահերից ելնելով, քանի որ կապահովվի պետական խնդիրների կատարումը, ասել է vedomosti.ru–ի աղբյուրներից մեկը։
Հայաստանի հետ կապված իրավիճակում, այս փուլում, կիրականացվի տեղեկատվական, այլ ոչ թե ընտրական աշխատանք։ «Հայաստանի ղեկավարությունը գնալով ավելի ու ավելի է թեքվում դեպի Արևմուտք, ինչը անընդունելի է Ռուսաստանի պետական քաղաքականության տեսանկյունից», - ասել է աղբյուրներից մեկը։
Աղբյուրներից մեկն էլ հայտնել է, որ ներկայումս աշխատանքներ են տարվում Հայաստանի տեղեկատվական օրակարգի հետ կապված։ Նա հիշեցրել է, որ Հայաստանում խորհրդարանական ընտրությունները միայն 2026 թվականին են և «դրանց մոտենալուն պես նոր խնդիրներ կդրվեն»։ Զրուցակիցները նշել են, որ Հայաստանի հետ կապված խնդիրներով զբաղվելու են Ներքին քաղաքականության վարչությունը (ղեկավար Անդրեյ Յարին), Հասարակական գործընթացների մոնիթորինգի և վերլուծության վարչությունը (Ալեքսանդր Խարիչև) և Հանրային նախագծերի վարչությունը (Սերգեյ Նովիկով)։
Կիրիենկոյի առջև խնդիր է դրվելու Հայաստանում մեղմ ուժ կիրառել ռուսական շահերն առաջ մղելու համար, ասել է նախագահի աշխատակազմին մոտ կանգնած մեկ այլ աղբյուր. «Նրանք կաշխատեն մոտավորապես նույն կերպ, ինչպես աշխատել են Աբխազիայում անցկացված վերջին ընտրությունների ժամանակ»։ Զրուցակիցը ենթադրել է, որ Նիկոլ Փաշինյանը միևնույն է կհաղթի հաջորդ ընտրություններում, «բայց հիմա հարցն ընտրությունների մասին չէ, այլ այնտեղ Ռուսաստանի ներկայության մասին է»։ Աղբյուրը նշել է, որ Հայաստանում ներկայումս ռուսամետ քաղաքական գործիչներ չկան, բացառությամբ նախորդների՝ Սերժ Սարգսյանի և Ռոբերտ Քոչարյանի և «հետևաբար, այնտեղ ոչ ոք չկա, որ խոսի Ռուսաստանի անունից»։
Հայաստանի դեպքում անհրաժեշտ է որոշել առաջնահերթությունները, ասել է Պետերբուրգի քաղաքականության հիմնադրամի նախագահ Միխայիլ Վինոգրադովը։ «Փաշինյանն անհարմար է Մոսկվայի համար, բայց ունակ է քաղաքական գոյատևման՝ չնայած ամեն ինչի։ 2026 թվականին Հայաստանում նախատեսված են խորհրդարանական ընտրություններ։ Մոսկվայի համար, հավանաբար, հարմարավետ կլիներ հիշեցնել իր մասին փորձելով գոնե փոքրամասնության մասնակցություն ունենալ հայկական քաղաքականության մեջ», - ասել է նա։ Այդ երկրում բնակչության հավատարմությունը Ռուսաստանի նկատմամբ ավելի բարձր էր, քան ԱՊՀ մյուս երկրներում, նշել է նա: «Սակայն վերջին ղարաբաղյան պատերազմում Ռուսաստանի կողմից օգնության բացակայության հետհամը կարող է ազդեցություն ունենալ»,– ասել է նա։
Նյութը հրապարակման պատրաստեց Կամո Խաչիկյանը
