Սերժ Սարգսյանի խոսքը ցնցումների է մատնել Փաշինյանին

Երրորդ նախագահ Սերժ Սարգսյանն օրերս Ծիծեռնակաբերդի հուշահամալիրում հարցազրույց էր տվել մի խումբ լրատվամիջոցների, հայտարարել, թե մինչև խորհրդարանական ընտրությունները Փաշինյանին հեռացնելու ծրագիր կա։ Ըստ Սարգսյանի, պահը հասունացել է։ Հարցին, թե ինչու է համոզված, որ այս անգամ Փաշինյանին հեռացնելու ծրագիրը կհաջողվի` հաշվի առնելով նախկինում տեղի ունեցած փորձերը, Սերժ Սարգսյանը պատասխանել էր. «Միգուցե հարցը հասունացած չէր, հիմա հասունացած է, այդ բոլոր շարժումները բերել են ու հասունացրել»։

Երրորդ նախագահի հայտարարությունները խուճապի են մատնել գործող իշխանություններին։ Փաշինյանը հրաշալի գիտի, թե ով է Սերժ Սարգսյանը և ավելորդ խոսքեր չի շռայլում, ուստի և ցնցումների մեջ է հայտնվել։ Ավելին, Փաշինյանը կարծում է, որ Սերժ Սարգսյանի մեսիջները հստակ հասցեատեր և հետևորդներ ունեն, ուստի և հանձնարարել է իր հատուկ ծառայություններին ամեն կերպ հետևել Սերժ Սարգսյանին, հասկանալ` ում հետ է շփվում, ում հետ է խոսում և ինչ են քննարկում։

Մյուս կողմից էլ Փաշինյանը մտավախություն ունի, որ հանրապետականները կարող են 2-3 տասնյակ իշխանական պատգամավորների, այսպես ասած, «գնել» և դարձնել իրենց կողմնակիցը։ Սա է ամենավտանգավոր զարգացումը, ըստ Փաշինյանի, ուստի և իրավապահ համակարգին խուճապահար հրամայել է թարմացնել բոլոր կոմպրոմատները սեփական կողմնակիցների, նույնիսկ ամենամերձավոր անձանց նկատմամբ, որպեսզի վերջիններս հանկարծ ինչ-որ խաղեր չկարողանան տալ։

Բոլոր այս հարցերում էլ Փաշինյանը չի խորշում ամենաստորին քայլերից, ընդհուպ մինչև սեռական բնույթի կոմպրոմատներ է հավաքում իր «թիմը» բռի մեջ պահելու համար։

Անի Սարգսյան