Աշխատանք Հայաստանում. ինչպես գտնել բարձր վարձատրվող աշխատանք
ՀԱՍԱՐԱԿՈՒԹՅՈՒՆ
Հայաստանում աշխատանքը գնալով ավելի պահանջված է դառնում, քանի որ տեղական աշխատաշուկան ակտիվորեն զարգանում է։ Անցած տարի ստեղծվել է գրեթե 20000 նոր աշխատատեղ, իսկ միջին ամսական աշխատավարձն աճել է 6,4 %-ով։ Թափուր աշխատատեղերի մեծ մասը բաց են պետական կառավարման, կրթության և առողջապահության ոլորտներում: Երկիրը պահանջում է նաև մասնագետներ տեղեկատվական տեխնոլոգիաների, մարքեթինգի և ֆինանսների ոլորտներում, գրում է politnavigator.news–ը։
Հայաստանում աշխատանքի տեղավորման ամենահեշտ և արագ գործընթացը հասանելի է տեղի քաղաքացիներին, ովքեր, ի տարբերություն օտարերկրացիների, կարիք չունեն աշխատանքի թույլտվություն ստանալու և երկրում մնալու։ Բացի այդ, միայն նման կարգավիճակով է հնարավոր աշխատել բացարձակապես ցանկացած ոլորտում, այդ թվում պետական կառույցներում։
Իսկ օտարերկրացիներին առաջին հերթին Հայաստանում աշխատանքի թույլտվություն է անհրաժեշտ։ Պետական մարմինների հետ բոլոր փոխգործակցությունը տեղի է ունենում առցանց: 2022 թվականի հունվարի 1-ից ներդրվել է աշխատանքի թույլտվությունների տրամադրման միասնական էլեկտրոնային համակարգ։ Հայաստանում ժամանակավոր կացության թույլտվություն ստանալն աշխատանքի մաս չէ, սակայն անհրաժեշտ է երկրում երկարատև մնալու համար: Բնակության թույլտվությունը սովորաբար տրվում է աշխատանքային պայմանագրի տևողությանը համապատասխանող ժամկետով, բայց առաջին անգամ ոչ ավելի, քան 12 ամսով: Բնակության քարտ ստանալուց հետո անհրաժեշտ է գրանցվել Հայաստանի հարկային ծառայությունում և ստանալ հարկ վճարողի նույնականացման համարը: Առանց դրա գործատուն չի կարողանա օրինական ճանապարհով աշխատավարձ վճարել, և աշխատանքային ստաժը գրանցել։
Եթե անձը նախատեսում է սեփական բիզնես բացել, ապա անհրաժեշտ է արտոնագիր Հայաստանում բիզնես վարելու համար: Նման փաստաթուղթ է պահանջվում մասնավոր ձեռներեցների և ինքնազբաղված մասնագետների համար, օրինակ վերանորոգողները, գեղեցկության մասնագետները, լուսանկարիչները: Հայաստանում մասնավոր իրավաբանական և բժշկական պրակտիկայում արտոնագրի փոխարեն պահանջվում է լիցենզիա։
Հայաստանում աշխատանքի համար դիմելիս մասնագետների որոշ կատեգորիաներ լիովին ազատվում են համապատասխան թույլտվություն ստանալու անհրաժեշտությունից։ Խոսքը, մասնավորապես, այն երկրների քաղաքացիների մասին է, որոնց հետ կա համապատասխան պայմանագիր, դրանք են ԵԱՏՄ անդամ երկրները:
Որոշ ոլորտներում կան օտարերկրացիներին աշխատանքի ընդունելու սահմանափակումներ: Օրինակ, պետական մարմիններում աշխատանքի համար կարող են դիմել միայն Հայաստանի քաղաքացիները։ Բացի այդ, շատ տեղական ընկերություններ պահանջում են հայերենի իմացություն: Այնուամենայնիվ, եթե կա բավարար մակարդակի որակավորում և/կամ աշխատանքային փորձ, ապա լեզվի իմացությունը միշտ չէ, որ պարտադիր պայման է աշխատանքի համար: Շատ միջազգային ձեռնարկություններ և ՏՏ ընկերություններ, ինչպիսիք են Gulian Digital LLC-ն և Sylex-ը, օգտագործում են անգլերեն և ռուսերեն:
Նյութը հրապարակման պատրաստեց Կամո Խաչիկյանը
