Թրամփը «չեղարկել» է Հայոց ցեղասպանության ճանաչումը
ՔԱՂԱՔԱԿԱՆՈՒԹՅՈՒՆ
ԱՄՆ նախագահ Դոնալդ Թրամփը, մեկնաբանելով 1915 թվականի հայ ժողովրդի ողբերգությունը, չի օգտագործել «ցեղասպանություն» բառը, գրում է EAdaily.com–ը։ Սպիտակ տան ղեկավարի ուղերձը հրապարակվել է Թրամփի վարչակազմի կայքում։ Նա ցավակցություն է հայտնել և սահմանափակվել է «Մեծ եղեռն» արտահայտությամբ, որը հայերենից թարգմանաբար նշանակում է «Մեծ ողբերգություն»։ «Այսօր մենք հարգում ենք «Մեծ եղեռնի» հիշատակը և հարգում այն հրաշալի մարդկանց հիշատակը, ովքեր տառապել են 20-րդ դարի ամենամեծ աղետներից մեկի ժամանակ։ 1915 թվականից սկսած՝ Օսմանյան կայսրության վերջին տարիներին, մեկուկես միլիոն հայեր արտաքսվել և ուղարկվել են անխուսափելի մահվան։ Այս հիշատակի օրը մենք կրկին միանում ենք Ամերիկայի և ամբողջ աշխարհի մեծ հայկական համայնքին սգալով զոհվածների համար», - ասված է Թրամփի ուղերձում։
Ըստ լրատվամիջոցների հաղորդագրությունների «այս կերպ Թրամփը փաստացիորեն հետ է կանչել Ջո Բայդենի կողմից կատարված ցեղասպանության ճանաչումը»։ 2021 թվականի ապրիլի 24-ին ԱՄՆ նախկին նախագահ Ջո Բայդենը պաշտոնապես ճանաչեց 20-րդ դարի սկզբին Օսմանյան կայսրությունում հայերի զանգվածային սպանությունները որպես ցեղասպանություն: Հաջորդ տարիներին Բայդենը նաև օգտագործեց «ցեղասպանություն» տերմինը խոսելով հայ ժողովրդի ողբերգության մասին։
Այսօրվա իր ուղերձում Թրամփը նշել է, որ իր վարչակազմը «մնում է հանձնառու կրոնական ազատության և խոցելի փոքրամասնությունների պաշտպանությանը», բայց առանց առանձնացնելու կոնկրետ էթնիկ խմբեր: Ինչպես նշել է Թրամփը, ամերիկացիները բախտավոր են, որ շատ հայեր իրենց հարուստ մշակույթը բերել են Միացյալ Նահանգներ և մեծ ներդրում են ունեցել երկրում: Նա նշել է մրցանակակիր զինվորականներին, նկարիչներին, ճարտարապետներին և գործարարներին։
«Զոհվածների հիշատակը հարգելով իմ վարչակազմը շարունակում է հանձնառու մնալ կրոնական ազատության ապահովմանը և խոցելի փոքրամասնությունների պաշտպանությանը: Մենք անհամբեր սպասում ենք Հայաստանի հետ մեր ռազմավարական գործընկերության շարունակմանը և տարածաշրջանում կայունության պահպանմանը, քանի որ շարունակում ենք ձգտել կայուն բարգավաճման և անվտանգության», - ասել է Թրամփը։
Օսմանյան կայսրությունում տեղի ունեցած Հայոց ցեղասպանությունը, որը ճանաչվել է որպես 20-րդ դարի առաջին ցեղասպանություն, ամեն տարի հիշվում է ապրիլի 24-ին: Թուրքիան հերքում է ավելի քան 1.5 միլիոն հայերի զանգվածային ոչնչացումը: Հայոց ցեղասպանությունն առաջին անգամ 1965 թվականին ճանաչել է Ուրուգվայը, որին հաջորդել են Կիպրոսը, Ռուսաստանը, Հունաստանը, Կանադան, Ֆրանսիան, Գերմանիան, ԱՄՆ-ը, տասնյակ այլ երկրներ, ինչպես նաև Եվրախորհրդարանը և Եկեղեցիների համաշխարհային խորհուրդը։
Նյութը հրապարակման պատրաստեց Կամո Խաչիկյանը
