Արշինովա. Հայաստանն այս պահին ամենաարագ տնտեսական աճն ունի զուգահեռ ներմուծումների շնորհիվ
ՔԱՂԱՔԱԿԱՆՈՒԹՅՈՒՆ
Հայաստանի ՀՆԱ-ն աճում է թռիչքներով և լայն քայլելով և այս պահին ունի ամենաարագ տնտեսական աճն ամբողջ մոլորակի վրա զուգահեռ ներմուծման և ԵԱՏՄ-ում մեր երկրների միավորման շնորհիվ։ Այս մասին «Եվրասիա. ավանդական արժեքների տարածք» միջազգային հասարակական և բիզնես ֆորումի շրջանակներում հայտարարել է ՀԱՆ «Եվրասիա» խորհրդի նախագահ, ՌԴ Պետդումայի պատգամավոր Ալենա Արշինովան, գրում է checheninfo.ru–ն։
«Ինչ վերաբերում է միջպետական հարաբերություններին, ապա հիմա կա որոշակի տուրբուլենտություն, քանի որ Հայաստանի ղեկավարության կողմից կան հայտարարություններ, որ մենք միասին զարգացնելու ենք Եվրասիական տնտեսական միությունը, բայց տեսնում ենք, որ ՀՀ ԱԺ-ն որոշում է կայացրել եվրաինտեգրման վերաբերյալ, և մենք մտածում ենք, որ Հայաստանը կարող է գնալ Մոլդովայի ճանապարհով: Իհարկե, մենք չենք կարող թույլ տալ դիսբալանս: Ինչպես Ռուսաստանի փոխվարչապետ Օվերչուկն է ասել, եթե Հայաստանը մտնում է Եվրամիություն, ուրեմն դուրս է գալիս Եվրասիական միությունից, դրանք փոխադարձ բացառող գործոններ են», —հայտարարել է պատգամավորը։
Արշինովան նաև ընդգծել է, որ առանց ռուսական էներգետիկ ռեսուրսների, առանց ռուսական ներդրումների և հայ-ռուսական ավանդական հարաբերությունների, զարգացում չի լինի: «Կլինի տուրբուլենտություն: Երբ խզվում է ավանդական տնտեսությունը, երբ խզվում են տնտեսական կապերը, անխուսափելիորեն գալիս է միջնորդը, ի նկատի ունեմ ԵՄ-ն, և սկսում է երկիրն իր համար վերաձևել, սկսում է միջամտել գնագոյացմանը, որոշում թե ինչ կլինի եվրոպական դարակներում, որտեղ հայկական արտադրանքը պետք չէ, ինչ կլինի հայկական շուկայի դարակներում»,– ասել է նա։
Հիշեցնենք, որ «Եվրասիա. ավանդական արժեքների տարածք» միջազգային հասարակական և գործարար համաժողովն անցկացվել է Մոսկվայի «Ռուսաստան» ազգային կենտրոնում և համընկել է «ԵՎՐԱՍԻԱ» միջազգային համագործակցության խթանման ինքնավար ոչ առևտրային կազմակերպության ստեղծման առաջին տարեդարձի հետ։ «Եվրասիա. ավանդական արժեքների տարածք» հասարակական և բիզնես ֆորումը համախմբել է մի քանի հարյուր մասնակիցների Հայաստանից, Աբխազիայից, Բելառուսից, Ղրղզստանից, Տաջիկստանից և Ուզբեկստանից։
Նյութը հրապարակման պատրաստեց Կամո Խաչիկյանը
