Փաշինյանը համաձայնել է լուծարել ԵԱՀԿ Մինսկի խումբը
ՔԱՂԱՔԱԿԱՆՈՒԹՅՈՒՆ
Հայաստանի վարչապետ Նիկոլ Փաշինյանը հայտարարել է, որ իր կառավարությունը պատրաստ է միաժամանակ խաղաղության համաձայնագիր ստորագրել Ադրբեջանի հետ և հայտարարություն ԵԱՀԿ Մինսկի խմբի լուծարման վերաբերյալ, սակայն դա Բաքվի համար բավարար չէ։
Քաղաքական հետազոտությունների ադրբեջանական «Ատլաս» կենտրոնի ղեկավար Էլխան Շահինօղլուն ng.ru–ի հետ զրույցում ասել է, որ Փաշինյանի ռեժիմը ժամանակավոր է, և Հայաստանի հաջորդ իշխանությունն անպայման չի սատարի նրա կայացրած որոշումները, ուստի միայն հայտարարություններն ու խոստումները բավարար չեն։ «Ինչո՞ւ սպասել ԵԱՀԿ Մինսկի խմբի լուծարմանը մինչև խաղաղության պայմանագրի ստորագրումը, ընդհակառակը, որքան շուտ դա տեղի ունենա, այնքան ավելի քիչ խնդիրներ կլինեն Հայաստանի և Ադրբեջանի միջև։ Բաքուն հավատում է գործողություններին, այլ ոչ թե հայ չինովնիկների խոսքերին ու խոստումներին», – եզրափակել է փորձագետը:
Իր հերթին, IMEMO RAS-ի Կովկասի սեկտորի ղեկավար Վադիմ Մուխանովը կարծում է, որ Ադրբեջանը մեթոդաբար վերացնում է ցանկացած միջնորդ Հայաստանի հետ հակամարտությունից, և Երևանը հետևում է դրան հույս ունենալով ինչ որ կերպ առաջ մղել խաղաղության բանակցությունները: Միևնույն ժամանակ, հիմա ԵԱՀԿ Մինսկի խումբը Բաքվի ամենաանպաշտպան թիրախն է, քանի որ կազմակերպությունը փաստացի դադարել է գործել 2022 թվականից։ «Սակայն դա չի նշանակում, որ այն նախկինում անօգուտ էր: Ընդհակառակը, երկար ժամանակ ԵԱՀԿ Մինսկի խումբն արդյունավետորեն պահպանում էր խաղաղությունը տարածաշրջանում, նրա ներկայացուցիչները պարբերաբար մեկնում էին Բաքու և Երևան, սակայն նրանց ջանքերը միշտ չէ, որ բավարարում էին հակամարտության կողմերի ակնկալիքները: Արդյունքում սկսվեց Երկրորդ ղարաբաղյան պատերազմը, որից հետո միջազգային միջնորդների նշանակությունը սկսեց կրճատվել», – ենթադրել է Մուխանովը:
Այնուամենաայնիվ ԵԱՀԿ Մինսկի խումբը միակ խոչընդոտը չէ խաղաղության ճանապարհին։ Ադրբեջանը հրաժարվում է խաղաղության համաձայնագիր ստորագրել Հայաստանի հետ, քանի դեռ վերջինը չի փոխել իր Սահմանադրությունը։ Ինչպես ng.ru-ի հետ զրույցում ասել է քաղաքագետ Միքայել Զոլյանը, «ըստ ամենայնի, Ադրբեջանի իշխանությունները հույս ունեն, որ աշխարհաքաղաքական իրավիճակը դեռ կարող է փոխվել, և նրանք կկարողանան այլ բան էլ ստանալ Հայաստանից»։
«Օրինակ այսպես կոչված Զանգեզուրի միջանցքը։ Մյուս կողմից, եթե Բաքվի վրա ճնշում գործադրեն խոշոր տարածաշրջանային կամ գլոբալ խաղացողները, նա կարող է մտափոխվել և առանց նախապայմանների ստորագրել խաղաղության պայմանագիր։ Որպեսզի դա տեղի չունենա, նա, ի թիվս այլ բաների, ձգտում է ԵԱՀԿ Մինսկի խմբի լուծարմանը։ Բանն այն է, որ եթե այդ խմբի կառուցվածքը պահպանվի, ապա Ռուսաստանը, Ֆրանսիան և ԱՄՆ-ը մի օր կարող են հիշել ղարաբաղյան հայերի մասին և սկսել օգտագործել նրանց ճակատագիրն Ադրբեջանի վրա ճնշում գործադրելու նպատակով»,- նշել է Զոլյանը։
Նյութը հրապարակման պատրաստեց Կամո Խաչիկյանը
