Իրանը հարաբերական թույլ վիճակում է, և դա պետք է օգտագործել նպատակին հասնելու համար. Իսրայելի ԱԳՆ
ՔԱՂԱՔԱԿԱՆՈՒԹՅՈՒՆ
Իսրայելի արտգործնախարար Գեդեոն Սաարը The Telegraph-ին տված հարցազրույցում մեկնաբանել է ԶԼՄ-ների հաղորդագրություններն առ այն, որ Իսրայելը մտադիր է մայիսին ռմբակոծել Իսլամական Հանրապետությանը։ Նա ասել է, որ Իսրայելը մտադիր չէ հարվածներ հասցնել Իրանի միջուկային օբյեկտներին:
«Ես Իսրայելի անվտանգության կաբինետի անդամ եմ, նեղ շրջանակով մասնակցում եմ բոլոր հանդիպումներին և չեմ հիշում նման որոշում... Չեմ կարծում, որ նման որոշում է կայացվել: Բայց Իսրայելի նպատակն է թույլ չտալ Իրանին միջուկային զենք ձեռք բերել», - ասել է Սաարը:
Նախարարի խոսքով՝ Իսրայելի համար իրապես գոյաբանական հարց է Իրանի սպառնալիքին դիմակայելը:
«Նրանք երկու անգամ հարձակվել են Իսրայելի վրա հարյուրավոր հրթիռներով, նրանք օգտագործում են պրոքսի ուժեր, ինչպես «Հեզբոլլահ»-ը, ՀԱՄԱՍ-ը և հութիները, որոնք ապակայունացրել են ամբողջ Մերձավոր Արևելքը: Եթե այդ ամենն արել են առանց միջուկային զենքի, ի՞նչ կարող են անել, եթե միջուկային հովանոց ունենան», - ասել է Սաարը։
Նա հաստատել է, որ երկրի իշխանությունները չեն ցանկանում, որ Իրանը միջուկային զինանոց ունենա։ Բայց դրան փորձում են հասնել դիվանագիտական, ոչ թե ռազմական ճանապարհով, վստահեցրել է քաղաքական գործիչը։ Նախարարն ասել է, որ եթե Թեհրանը միջուկային զենք ստեղծի, դա կարող է տարածաշրջանում միջուկային սպառազինությունների մրցավազքի հանգեցնել։ Սաարը կարծում է, որ Իրանից օրինակ վերցնելով՝ Թուրքիան, Սաուդյան Արաբիան և Եգիպտոսը կցանկանան զանգվածային ոչնչացման զենք ստեղծել։
«Իրանը հարաբերական թույլ վիճակում է, և դա պետք է օգտագործել նպատակին հասնելու համար, այլ ոչ թե Իրանին թույլ տալ փախչել, ժամանակ վատնել, մինչև հանգամանքները փոխվեն», - ընդգծել է նա։
