Սպասում էի այդ պահին․ Էդուարդ Սպերցյանը՝ «Կրասնոդարի» ռեկորդակիր

«Կրասնոդարի» կիսապաշտպան Էդուարդ Սպերցյանը ամփոփել է Ռուսաստանի Պրեմիեր լիգայի 25-րդ տուրում «Ախմատի» նկատմամբ տոնած հաղթանակը (3:1)։

— Դու դարձար «Կրասնոդարի» ռեկորդակիր՝ իրացնելով 14-րդ 11-մետրանոցը։ Ի՞նչ զգացողություններ ունես քո անունը ակումբի պատմության մեջ գրանցելու կապակցությամբ։

— Իհարկե, սպասում էի այդ պահին, հետևում էի վիճակագրությանը։ Ինձ համար մեծ պատիվ է անունս գրանցել իմ հայրենիք դարձած ակումբի պատմության մեջ։ Բնականաբար, այդ գոլը կարևոր էր նաև խաղի տեսանկյունից, ուստի ուրախ եմ, որ կարողացա օգնել։

— Կասե՞ս, որ այդ գոլը շրջադարձային էր։

— Կարելի է այդպես ասել։

— Երբ հարվածում էիր, մտածո՞ւմ էիր ռեկորդի մասին։

— Ոչ, այդ մասին չէի մտածում։ Առաջին միտքս այն էր, թե ինչպես հարվածել։ Այդ պահին ամենակարևորն է չփոխել սեփական որոշումը։

— Հիշո՞ւմ ես այդ պահը։

— Իհարկե։ Մի անգամ արձակուրդի ժամանակ Շելիայի հետ խոսում էինք իմ 11-մետրանոցների մասին։ Անկեղծ ասած, մի փոքր լարված էի, քանի որ մտածում էի, որ նա կարող է հիշել այդ զրույցը և ցատկել ճիշտ ուղղությամբ, բայց նա չկարողացավ հետ մղել հարվածը։

— Ինչո՞ւ այսքան ժամանակ չէիք կարողանում հաղթել «Ախմատին», ինչո՞վ էր դա պայմանավորված։

— Նրանց հետ խաղալը շատ բարդ է, քանի որ խաղադաշտում բազմաթիվ մարտեր են ընթանում, և նրանք երբեք չեն նահանջում։ Սակայն մենք ճիշտ մոտեցում և տրամադրվածություն ունեինք, ինչի շնորհիվ հաղթեցինք։ Իհարկե, շնորհակալություն ենք հայտնում մեր երկրպագուներին։

Էդուարդ Սպերցյանը խփել է իր 8-րդ գոլը ընթացիկ մրցաշրջանում (բոլորը՝ ՌՊԼ-ում), ընդհանուր առմամբ՝ 37-րդը Ռուսաստանի Պրեմիեր լիգայում և 41-րդը «Կրասնոդարի» կազմում: Նրա ընդհանուր ցուցանիշը՝ «գոլ + փոխանցում», սև-կանաչների կազմում հասել է 66-ի (41 գոլ և 25 գոլային փոխանցում): Իրացնելով 11-մետրանոցը՝ Էդուարդը միաժամանակ երկու ակումբային ռեկորդ է սահմանել՝ ամենաշատ հարվածած 11-մետրանոցների (15) և ամենաշատ իրացրած 11-մետրանոցների (14) քանակով:

Էդուարդ Սպերցյանը անցկացրեց իր 110-րդ հանդիպումը Ռուսաստանի Պրեմիեր լիգայում (բոլորն էլ՝ «Կրասնոդարի» կազմում)։