Փորձագետը բացատրում է, թե ինչո՞ւ է Հայաստանը հայտարարել ԵՄ-ին անդամակցելու իր մտադրության մասին հենց հիմա
ՔԱՂԱՔԱԿԱՆՈՒԹՅՈՒՆ
Քաղաքագետ, Մերձավոր Արևելքի և Կովկասի հարցերով փորձագետ Ստանիսլավ Տարասովը Gazeta.ru-ին տված հարցազրույցում մեկնաբանել է Հայաստանի խորհրդարանի ընդունած օրինագիծը Եվրամիությանն անդամակցելու մտադրության մասին։ Նրա կարծիքով, այդ որոշմամբ Երևանը փորձում է շանտաժի ենթարկել Մոսկվային: «Սակայն խորհրդարանի այդ որոշումը բավարար չէ, նրանք պետք է անցկացնեն համահայկական հանրաքվե, և միայն այդ դեպքում խորհրդարանի նման որոշումն օրինական ուժ կունենա»,- նշել է Տարասովը։
Նա հավելել է, որ Հայաստանի իրական խնդիրները Բրյուսելին քիչ են մտահոգում։ ԵՄ-ն այդ երկիրը դիտարկում է միայն որպես «փուշ» Ռուսաստանի համար։ Բացի այդ, նրա խոսքով, Երևանը չի կարող միաժամանակ լինել Եվրամիության, Հավաքական անվտանգության պայմանագրի կազմակերպության (ՀԱՊԿ) և Եվրասիական տնտեսական միության (ԵԱՏՄ) անդամ։
Հիշեցնենք, որ մարտի 26-ին հայտնի դարձավ, որ Հայաստանի խորհրդարանը վերջնական ընթերցմամբ ընդունել է երկրի Եվրամիությանն անդամակցելու մտադրության մասին օրինագիծը։ Փաստաթղթի ընդունմանը կողմ է քվեարկել 64, դեմ՝ 7 պատգամավոր։ Նշվում է, որ նախագծին աջակցել են միայն իշխող «Քաղաքացիական պայմանագիր» կուսակցության պատգամավորները, իսկ ընդդիմությունն այն անվանել է անհեթեթ, քանի որ ԵՄ-ն Հայաստանին անդամակցություն չի առաջարկել։
Նյութը հրապարակման պատրաստեց Կամո Խաչիկյանը
