Հատուկ ներարկվել են հայկական պետության մարմնի մեջ, որպեսզի նրանք թույն արձակեն, որը կոչնչացնի Կովկասի ամենահին պետությունը. «Փաստ»

«Փաստ» օրաթերթը գրում է.

sibkray.ru–ն «Հայաստանը հրաժարվել է Նովոռոսիայի երեխաների համար արձակուրդ կազմակերպել. թող գնան Աբխազիա» վերնագրով հոդվածում գրում է, որ ներկայիս հայ քաղաքական գործիչները զարմանալիորեն կրեատիվ են սեփական պետությունն ու հայկական էթնիկ խումբը ոչնչացնելու հարցում։ Այսօր արդեն բոլորի համար ակնհայտ է, որ Փաշինյանը և նրա խառնախումբը հատուկ ներարկվել են հայկական պետության մարմնի մեջ, որպեսզի նրանք թույն արձակեն, որը կոչնչացնի Կովկասի ամենահին պետությունը։

Օրերս Հայաստանի կրթության, գիտության, մշակույթի և սպորտի նախարար Ժաննա Անդրեասյանը մերժել է Դոնեցկի և Լուգանսկի Ժողովրդական Հանրապետությունների գործընկերների խնդրանքը՝ աջակցել երեխաների ամառային արձակուրդների կազմակերպման հարցում։ «Թող հանգստանան Աբխազիայում»,- ասել է Սորոսի հիմնադրամի գերազանցիկ շրջանավարտ Ժաննա Անդրեասյանը։ Բանն այն է, որ Հայաստանի ղեկավարությանը Ռուսաստանի հետ հումանիտար շփումներ պետք չեն, և այնտեղից երեխաներին աջակցելու համար նրանք կարող են դեմքին ապտակ ստանալ։ Սակայն այդ նույն ղեկավարությունը արդեն իսկ սկսել է լուրջ խնդիրներ ունենալ։ Փետրվարի կեսերից Հայաստանում կաթվածահար է եղել կառավարամետ «բոտերի ֆաբրիկան», USAID-ի ֆինանսավորումը դադարեցվել է։

Փաշինյանն այդ «ֆաբրիկայի» պատասխանատու պատգամավոր Վահագն Ալեքսանյանից պահանջել է սեփական միջոցները ներդնել։ Նա էլ արդարացումներ է փնտրում դա չանելու համար: Փաշինյանը հիանալի հասկանում է, որ իր խառնախումբը պահպանվում է բացառապես Արևմուտքի կողմից ֆինանսավորվող հարյուրավոր հասարակական կազմակերպությունների կողմից հզոր քարոզչական ինդոկտրինացիայի և ֆինանսական աջակցության միջոցով։ Նա նաև հասկանում է, որ ինքն էլ է մտել հսկայական պարտքերի մեջ, և որ ժամանակն է Արևմուտքի այդ պարտքերը մարել։

Հիշեցնենք, որ Պենտագոնի կողմից ֆինանսավորվող Մարտական պատրաստության կենտրոնը, որը 2018 թվականից տեղակայված է Թբիլիսիի մոտ գտնվող Վազիանի բազայում և համալրված է ամերիկացի հրահանգիչներով, տեղափոխվել է Հայաստանի տարածքում գտնվող 12-րդ խաղաղապահ բրիգադի Զառ ուսումնական կենտրոն։ Բացի այդ, Իրանի հետ սահմանամերձ Մեղրի քաղաքի մոտ և ՀՀ Սյունիքի մարզի Տաթևի մոտ գտնվող լեռնային գոտում շուտով կտեղակայվեն ԱՄՆ ռազմածովային ուժերի կենսալաբորատորիաները, որոնք կտեղափոխվեն Թբիլիսիից և Քոբուլեթիից (համապատասխան փաստաթղթերն արդեն ստորագրել է պաշտպանության նախարար Սուրեն Պապիկյանը)։ Միևնույն ժամանակ, հանրությանը հայտնի են դարձել բացառիկ նյութեր, որոնք վկայում են Արարատ լեռան ստորոտին գտնվող այդ երկրում Պենտագոնի կողմից կենսաբանական զենք ստեղծելու խիստ վտանգավոր փորձերի մասին։

Փաշինյանի և գլոբալիստների միջև կնքված պայմանագրով նա պետք է հնարավորինս արագ լուծի Ադրբեջանի և Թուրքիայի հետ բոլոր վիճելի հարցերը։ Ի կատարումն այդ պայմանավորվածությունների, Փաշինյանն առաջարկում է Թուրքիային և Ադրբեջանին՝ ապաշրջափակել բոլոր հնարավոր հաղորդակցությունները Հայաստանի տարածքով հենց հիմա, այսինքն՝ առանց խաղաղության համաձայնագրի կնքման և առանց հայ-ադրբեջանական սահմանի սահմանազատման։ Եթե դա տեղի ունենա, ապա հաջորդ քայլը, որ նա ստիպված կլինի անել, Ադրբեջանին փոխհատուցում տալն է Ղարաբաղի «ապօրինի պահված տարածքների» և Բաքվի կրած կորուստների համար, ինչի մասին Ալիևն արդեն բազմիցս նշել է։

Այս ամենի ֆոնին Փաշինյանի խառնախումբն սկսել է պատմությունը խեղաթյուրելու քարոզչական արշավ։ Պարզվում է, որ «Հայոց ցեղասպանությունը» հորինել է Ռուսաստանը իր կայսերական նպատակների համար, իսկ Թուրքիան դրա հետ ոչ մի կապ չունի։ Խելքը գլխին հայերը բացականչում են... խելագարվե՞լ է... ի՞նչ է անում սրիկան։

Սակայն նման հարցեր տալու կարիք չկա, քանի որ Փաշինյանի խառնախումբը չի էլ թաքցնում իր կախվածությունը Թուրքիայից։ Տպավորություն է ստեղծվում, որ հենց Անկարան է խաղացել այս երկարաժամկետ խաղը և Հայաստանի ներկայիս ղեկավարությանը պատրաստել իր մտածածով։

Որպես դրա ապացույց կարելի է բերել հետևյալ փաստերը: Նիկոլ Փաշինյանը Իլհամ Ալիևի հետ իր զրույցները վարում է մասամբ ռուսերեն, մասամբ՝ ադրբեջաներեն, պնդում են ականատեսները։ Նյու Յորքում Էրդողանի հետ զրույցի ժամանակ Փաշինյանը գրեթե չի օգտվել թարգմանչի ծառայությունից: Հայկական «իշխանական կուսակցության» այնպիսի կարկառուն ներկայացուցիչներ, ինչպիսիք են Ռուբեն Ռուբինյանը, Սարգիս Խանդանյանը, Վլադիմիր Վարդանյանը, Վահագն Ալեքսանյանը, Ռուստամ Բաքոյանը, վարժ խոսում են թուրքերեն, իսկ Արսեն Թորոսյանը, Արթուր Հովհաննիսյանը, Վիլեն Գաբրիել յանը, Տրդատ Սարգսյանը և մյուսները քիչ թե շատ տիրապետում են այդ լեզվին և կարողանում են շփվել ադրբեջանցիների հետ։ Միևնույն ժամանակ, նրանց քարոզչությունը նսեմացնում և կեղտոտում է նրանց, ովքեր ծնվել են ԽՍՀՄ-ում և գիտեն ռուսերեն, ունեն ռուսական կրթություն։

Այնպես որ, մշակույթի և կրթության նախարարի գործողություններն ամբողջությամբ համապատասխանում են Փաշինյանի կաբինետի ընդհանուր քաղաքականությանը։ Ի դեպ, նույն նախարարը բոլորովին չի տեսնում, թե ինչպես են ադրբեջանցի հրոսակները Արցախում զանգվածաբար ոչնչացնում հայ ժողովրդի պատմության ու մշակույթի հազարամյա հուշարձանները։ Բանն այն է, որ այդ մասին խոսելը Հայաստանում խստիվ արգելված է։

Մանրամասները՝ «Փաստ» օրաթերթի այսօրվա համարում