Ադրբեջանի տեղեկատվական «պատերազմը» Հայաստանի դեմ
ՀԱՍԱՐԱԿՈՒԹՅՈՒՆ
Արդեն մի քանի օր է՝ Ադրբեջանի ՊՆ-ն հայտարարում է, որ իբր ՀՀ զինված ուժերի ստորաբաժանումները կրակ են բացում ադրբեջանական դիրքերի ուղղությամբ։ Հայաստանի պաշտպանության նախարարությունը հերքում է այդ տեղեկությունը։ Ընդ որում, Ադրբեջանն այդ հարցում փաստեր կամ ապացույցներ չի ներկայացնում։ Հայաստանում ԵՄ առաքելությունը նույնպես հերքել է մարտի 16-17-ին Հայաստանի հասցեին Ադրբեջանի մեղադրանքները, գրում է Jnews.ge–ն։
Հիշեցնենք, որ ավելի վաղ ՀՀ վարչապետի աշխատակազմն առաջարկել էր ստեղծել Հայաստանի և Ադրբեջանի միջև հրադադարի խախտման դեպքերը և/կամ դրանց մասին տեղեկությունները հետաքննելու համատեղ մեխանիզմ, սակայն Ադրբեջանը դեռևս չի արձագանքել այդ առաջարկին։ Հետևելով վերը նշված բոլոր հաղորդումներին՝ ՀՀ ՊՆ-ն իրականացրել է ստուգիչ աշխատանքներ և ստուգման արդյունքներով հերքել հայկական բանակի կողմից հրադադարի ռեժիմի խախտման մասին պնդումները։ Նաև նշվել է, որ այս պահին Ադրբեջանի Հանրապետությունը Հայաստանի Հանրապետությանը չի ուղարկել ՀՀ բանակի կողմից հրադադարի ռեժիմի խախտման փաստական տվյալներ կամ հիմնավորում։
ՀՀ վարչապետի աշխատակազմը` հաստատելով հրադադարի ռեժիմի խախտման դեպքերի և/կամ դրանց վերաբերյալ նմանատիպ տեղեկությունների հետաքննության հայ-ադրբեջանական համատեղ մեխանիզմ ստեղծելու իր առաջարկը, նշել է, որ ՀՀ բանակը հրադադարի ռեժիմը խախտելու հիմքեր կամ հրահանգներ չունի։
Նյութը հրապարակման պատրաստեց Կամո Խաչիկյանը
