Բոլորն էլ նույնն են.... «Փաստ»

«Փաստ» օրաթերթը գրում է.

Փաշինյանի իշխանության «կարկառուն» ներկայացուցիչ Անդրանիկ Քոչարյանը հերթական անգամ է «աչքի ընկել», շատ մեղմ ասած, դատապարտելի պահվածքով՝ այս անգամ լրագրող Հռիփսիմե Ջեբեջյանի նկատմամբ դրսևորելով վարքագիծ, որը դժվար է որակել քաղաքավարության սահմաններում:

Մյուս կողմից՝ սա նույնիսկ զարմանալի էլ չէ: Նախ՝ այն, ինչ արել է ՔՊ խմբակցության անդամը, ավելին՝ ԱԺ մշտական հանձնաժողովներից մեկի նախագահ Անդրանիկ Քոչարյանը, առաջին նմանօրինակ դեպքը չէ: Նշված քպականը պարբերաբար է ագրեսիվ դիրքավորվում լրագրողների նկատմամբ: Դե, հասկանալի է, խոսքը իշխանական լրագրողների մասին չէ: Երկրորդ՝ նա Փաշինյանի իշխանության միակ ներկայացուցիչը չէ, որ բացահայտ թշնամական ու ագրեսիվ պահվածք կամ վերաբերմունք է դրսևորում լրագրողների նկատմամբ: Առանց շատ «հեռու» գնալու, կարելի է հիշեցնել թեկուզ ԱԳ նախարարի պաշտոնն զբաղեցնող Արարատ Միրզոյանի՝ վերջերս դրսևորած անհարգալից վարքը: Շարքը շարունակական է, ավելորդ չթվարկենք, բոլորի աչքի առջև է այդ ամենը կատարվում:

Լրագրողների, իսկ մեծ հաշվով՝ նաև հանրության նկատմամբ անհարգալից, ցինիկ, ագրեսիվ պահվածքը այդ կուսակցության, Փաշինյանի գլխավորած իշխանության դեմքն ու նկարագիրն են դարձել: Ու պատահական չէ, որ ոչ մի քպական փորձ անգամ չարեց «թեթևի մեջ» դատապարտել պահվածքը: Էլ չենք խոսում այն մասին, որ իրեն հարգող որևէ կուսակցություն այդ կերպ իրեն դրսևորած կուսակցականին կհորդորեր վայր դնել պատգամավորական մանդատը: Դե, առնվազն «sms» կուղարկեր կուսակցության ղեկավարը, որը համատեղության կարգով նաև վարչապետ է...

Չեն դատապարտել, ու ոչ միայն այս դեպքում: Ու քանի որ ՔՊ-ն չի դատապարտել իր կարկառուն ներկայացուցչի, ներկայացուցիչների պահվածքը, ուրեմն՝ համաձայն են նրա (նրանց) հետ: Ուրեմն՝ նրանք բոլորը նույնն են: Ի դեպ, սա էլ զարմանալի չէ. ի վերջո, նույն Նիկոլ Փաշինյանն էլ պարբերաբար աչքի է ընկել վիրավորական արտահայտություններով, ագրեսիվությամբ, ատելության խոսքով...

Մանրամասները՝ «Փաստ» օրաթերթի այսօրվա համարում