«Mercedes»-ը, «Չայնիի» ոլորաններում մոտ 100 մետր գլորվելով, բախվել է քարերին ու հայտնվել ձորում. Shamshyan
ՀԱՍԱՐԱԿՈՒԹՅՈՒՆ
Այսօր՝ մարտի 19-ին, խոշոր ավտովթար է տեղի ունեցել Կոտայքի մարզում: Ժամը 14:10-ի սահմաններում «Mercedes GLE» մակնիշի ավտոմեքենան Երևան-Սևան ավտոճանապարհի 21,5 կմ հատվածում՝ դեպի Սևան ընթանալիս, դուրս է եկել երթևեկելի գոտուց, և մոտ 100 մետր ապառաժ քարերին բախվելով, մի քանի պտույտ շրջվելով հատնվել է ձորում՝ քարերի վրա:
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով վարորդն ու ողևորը, որոնց առաջինը օգնության են հասել քաղաքացիները, օպերատիվորեն ժամանած «Աբովյան» բժշկական կենտրոնի շտապօգնության բժիշկներն ու ՀՀ ներքին գործերի նախարարության ոստիկանության Պարեկային ծառայության Կոտայքի մարզի գումարտակի պարեկները՝ գումարտակի հրամանատար Լևոն Բադալյանի, գումարտակի հրամանատարի տեղակալ Վահագն Կարապետյանի, գումարտակի ծառայության ավագ տեսուչ Արտակ Ասատրյանի, գումարտակի ծառայության տեսուչ Կառլեն Բաղյանի, վաշտի հրամանատար Դավիթ Հովհաննիսյանի և դասակի հրամանատար Դավիթ Քարիմյանի գլխավորությամբ, վիրավորներին պատգարակով մոտեցրել են շտապօգնության ավտոմեքենային:
Բժիշկները վիրավորներին մինչև հիվանդանոց տեղափոխելը տեղում անհրաժեշտ բուժօգնություն են ցուցաբերել, ապա տեղափոխել Հերացու անվան 1-ին համալսարանական հիվանդանոց:
Ֆոտոլրագրողը հայտնում է, որ վարորդն ու ուղևորը փրկվել են շնորհիվ ամրագոտու, քանի որ նրանց ավտեմեքենայից դուրս բերած քաղաքացիներն ասում էին, որ վարորդն ու ուղևորը ամրակապված են եղել, հակառակ դեպքում հնարավոր է ավտոմեքենայի գլորվելու արդյունքում նրանք հայտնվեին դրսում, ինչպես որ տեղի էր ունեցել այսօր՝ նույն վթարի վայրից մի քանի մետր այն կողմ առավոտյան՝ «Volkswagen Passat»-ի մասնակցությամբ տեղի ունեցած վթարի ժամանակ, երբ «Volkswagen»-ի վարորդի մարմինը հայտնաբերվել էր ավտոմեքենայից դուրս, իսկ դրսում հայտնվելու պատճառը չամրակապվելն է եղել:
