ԱՄՆ-ում հրապարակվել են Քենեդու սպանության փաստաթղթերը

ԱՄՆ-ը հրապարակեց գաղտնազերծված փաստաթղթեր նախագահ Ջոն Քենեդիի, նրա քաղաքական գործիչ եղբոր՝ Ռոբերտի և սևամորթների իրավունքների պաշտպան Մարտին Լյութեր Քինգի սպանության վերաբերյալ, ասվում է Ազգային արխիվի կայքում տեղադրված գրառման մեջ:

«Համաձայն նախագահ Դոնալդ Թրամփի 2025 թվականի մարտի 17-ի հրահանգի՝ նախկինում բոլոր գաղտնի տեղեկությունները, որոնք Ջոն Քենեդու սպանության հավաքածուի մաս են կազմում, հրապարակվում են հանրության համար»,- ասվում է արխիվի կայքում։

1992 թվականից ամերիկյան իշխանությունները աստիճանաբար գաղտնազերծում են նախագահ Քենեդիի սպանության հետաքննության նյութերը։ Այս մասին հրամանագիր է արձակել Միացյալ Նահանգների նախագահը։ Այսպես, 2023 թվականին ԱՄՆ Ազգային արխիվը հրապարակել է մոտ 2,7 հազար գրառում։ 2025 թվականի հունվարին Թրամփը ստորագրել է գործադիր հրաման՝ Քենեդու, նրա կրտսեր եղբոր՝ ԱՄՆ նախկին գլխավոր դատախազ Ռոբերտ Քենեդու և սևամորթ քաղաքացիական իրավունքների ակտիվիստ Մարտին Լյութեր Քինգի սպանություններին վերաբերող փաստաթղթերը գաղտնազերծելու վերաբերյալ։