Ծանոթ ու միաժամանակ անհայտ … Այրիշ մեստ լիկյոր

Իռլանդական Irish Mist (իռլանդական մառախուղ) լիկյորը շատ հին խմիչք է: Դրա նախատիպը հորինվել է դեռ 5-րդ դարում։ Այն ժամանակ միայն հարուստ կլանները կարող էին իրենց թույլ տալ այդ ըմպելիքը, որը հիմնված էր հեթրի՝ ծաղկի մեղրի, ածիկի, տարբեր խոտաբույսերի և ալկոհոլի վրա։

17-րդ դարի վերջին, երբ իռլանդական ազնվականությունն արագորեն տեղափոխվում էր Եվրոպա, բաղադրատոմսը կորել է և միայն պատահականորեն վերականգնվել 20-րդ դարում։ Ինչպես հայտնի է «պաշտոնական» լեգենդից, դա հնարավոր է դարձել մի ճանապարհորդի շնորհիվ, ով իր հետ ունեցել է մի հին փաստաթուղթ։ Իռլանդիայում գտնվելու ժամանակ նա այդ փաստաթուղթը տվել է Ուիլյամս ընտանիքին, որը 19-րդ դարի կեսերից կենտրոնական Իռլանդիայում վիսկի էր արտադրում։ Այդ ձեռագիրն ուսումնասիրելու համար փորձագետներին տալով Ուիլյամսները պարզել են, որ այդ ձեռագիրը ոչ այլ ինչ է, քան հենց այդ «հեթրի գինու» բաղադրատոմսը, որի մասին տեղեկություններ էին մնացել միայն իռլանդական լեգենդներում: 1947 թվականին ընկերության մասնագետները վերականգնել են ըմպելիքի արտադրության տեխնոլոգիան և հիմնել դրա արդյունաբերական արտադրությունը՝ Irish Mist անունով։

Իռլանդական այդ լիկյորն ունի մուգ ոսկեգույն գույն և 35 % ալկոհոլի պարունակություն: Մեղրի քաղցր համը համակցված է շոկոլադի և տարբեր խոտաբույսերի բույրերի հետ։ Բացի այդ, հստակ զգացվում է վիսկիի բույրը։ Լիկյորը կարելի է օգտագործել սառույցով իր մաքուր տեսքով, որպես բազմաթիվ կոկտեյլների մի մաս կամ ավելացնել սուրճին: Բացի այդ, լիկյորն օգտագործվում է խոհարարության մեջ՝ նրբագեղ թխվածների արտադրության համար:

Irish Mist լիկյորի արտադրությունը սկսվում է կուպաժավորմամբ, երբ որոշակի համամասնությամբ խառնում են 4 տարբեր տեսակի վիսկիներ, որից հետո խառնուրդը հետագայում հնեցվում է: Դրանից հետո ստացված վիսկիին մեղր են ավելացնում։ Հարկ է նշել, որ լիկյորի համար նախատեսված մեղրը պատրաստվում է պատվերով, և այն նաև երկու տեսակի մեղրերի խառնուրդ է՝ հեթրի մեղրի և երեքնուկի մեղրի։ Մանրակրկիտ մաքրումից հետո դրանք խառնում են և ավելացնում վիսկիին։ Արտադրության վերջնական փուլում լիկյորի մեջ ավելացվում են տարբեր իռլանդական խոտաբույսերի մզվածքներ:

Ստացված լիկյորը լցվում է բրենդավորված շշերի մեջ, որոնք ոճավորված են որպես ուոտֆորդյան հաղճապակյա գրաֆիններ: Պիտակի վրա պատկերված է Tara բրոշի պատկերը, որն այն անգին գանձերից մեկն է, որը մեզ է հասել միջնադարյան Իռլանդիայում բնակվող հնագույն կլաններից:

Ներկայումս այդ լիկյորի բիզնեսն այլևս Ուիլյամս ընտանիքի սեփականությունը չէ։ Դեռ 1985 թվականին է այն գնել Cantrell Cochrane Group կորպորացիան, որը, բարեբախտաբար, անփոփոխ է թողել լիկյորի բաղադրատոմսը։
 
Կ. Խաչիկյան