Կոշկակարների ընտանիքի մեծ բանասերը. Աճառյանի ծննդյան օրն է

Կոշկակարների ընտանիքում ծնված Հրաչյա Աճառյանը բացի հայոց լեզվից գիտեր նաև 20 այլ լեզու։

Այսօր Աճառյանի ծննդյան օրն է։ ArmLur.am-ը ներկայացնում է Հրաչյա Աճառյանի կյանքը։

Աճառյանի կյանքը, սկսած մանկությունից, ամբողջովին թաթախված է եղել ուսման մեջ և դրանում համոզվելը ամենևին էլ բարդ չէ։

Աճառյանը սովորել է Կոստանդնուպոլսի կենտրոնական վարժարանում, ինչից հետո մեկնել է Փարիզ և Սորբոնի համալսարանում ստացել իր բարձրագույն կրթությունը։

Աճառյանի դերը մեծ է հայերի կյանքում, քանի որ վերջինիս ձեռամբ կորստից փրկվել են հայ մշակույթի որոշ արժեքներ։

Աճառյանը շրջել է պատմական Հայաստանի շատ վայրերով, ուսումնասիրել է մագաղաթներ, հուշարձաններ՝ հատկապես խորանալով մի շարք բարբառների հետազոտության մեջ և զանազան նյութեր է հավաքել հայագիտության տարբեր ճյուղերի համար։ Գավառական ուսուցչի թափառական դրությունը Աճառյանին թույլ չի տվել հրապարակելու իր կարևոր աշխատությունները։

Երկար տարիներ Աճառյանը ուսուցչությամբ է զբաղվել Էջմիածնում, Շուշիում, Թավրիզում, Նոր-Նախիջևանում, Կարինում և այլուր։

Միայն խրհրդային բարքերի հաստատումից հետո Աճառյանը նշանակվում է պետական համալսարանի դասախոս և ամբողջապես նվիրվում է գիտական ու մանկավարժական աշխատանքների, իրար ետևից լույս է ընծայում բազմաթիվ գիտական աշխատություններ։

Ականավոր հայ լեզվաբանը հայտնի է նաև գիտական աշխատություններով հայոց լեզվի բարբառաբանության, լեքսիկոլոգիայի, լեքսիկոգրաֆիայի վերաբերյալ։