Նախկին նախագահների միջև պայքարը մտահոգել է հայ մեծահարուստներին

Երկրորդ և երրորդ նախագահների թիմերի միջև օրեցօր թեժացող պատերազմը, որ սպառնում է լուրջ հետևանքներ ունենալ ընդդիմադիր դաշտի համար, մտահոգել է ոչ միայն ներհայաստանյան ուժերին, այլև արտերկրի հայկական շրջանակներին, հատկապես ՌԴ-ում բնակվող հայ մեծահարուստներին։

Մեր տեղեկություններով, Ռուսաստանում բնակվող հայ մեծահարուստներն այս օրերին պարբերաբար հանդիպում են, քննարկում, թե ինչպես մարեն այդ կրակը։ Որոշել են այսպես կոչված «խաղաղարար» առաքելությամբ գալ Հայաստան, հանդիպել թե՛ Ռոբերտ Քոչարյանի, թե՛ Սերժ Սարգսյանի հետ, ընդդիմադիր դաշտի հրադադար հայտարարեն։ Համոզելու են, որ այդ պայքարը բխում է միայն Նիկոլ Փաշինյանի շահերից, վնասում ընդդիմությանը։ Ընդ որում, այդ հանդիպումներից մեկում նշվել է, թե առաքելությունը կարող է ձախողվել, բայց առնվազն պետք է փորձ ձեռնարկել, փորձել մոտեցնել 2-րդի և 3-րդի թիմերի մոտեցումները, համոզել իրար չուտել։

Տիտղոսային ընդդիմության երկու թևերի այս պայքարն արդեն համահայկական դրսևորումներ է ստանում։ Սփյուռքյան տարբեր շրջանակներ համոզված են, թե դա միայն վնասում է Հայաստանին։ Ոչ հրապարակային, այլ խորհրդապահական խողովակներով ընդդիմության հետ կապվել են նաև Անթիլիասից, խնդրել՝ շատ չտարածվել, չօգնել Փաշինյանին, որը երկիրը տանում է վերջնական կործանում։

Սրբուհի Արամյան