ԵՄ-ն զինում է Հայաստանին շարունակվող բանակցությունների պայմաններում
ՔԱՂԱՔԱԿԱՆՈՒԹՅՈՒՆ
Մոտ ապագայում Եվրամիությունը (ԵՄ) նախատեսում է ևս մեկ անգամ օգնություն տրամադրել Հայաստանին Խաղաղության եվրոպական հիմնադրամի միջոցով։ 2024 թվականի հուլիսին այն արդեն 10 միլիոն եվրո է հատկացրել Երևանին Հայաստանի զինված ուժերի նյութատեխնիկական և նյութական կարողություններն ուժեղացնելու համար։ Այն ժամանակ հայ քաղաքագետ Արեգ Քոչինյանը կանխատեսում էր, որ այդ տրանշը միայն ավելի մեծ գործընթացի սկիզբն է, գրում է eureporter.co–ն։
ԵՄ-ի կողմից Հայաստանին ռազմական օգնություն հատկացնելն ուղղակիորեն հակասում է խաղաղությանն ուղղված ԵՄ հայտարարած հանձնառությանը, քանի որ ԵՄ պաշտոնյաները բազմիցս են ընդգծել տարածաշրջանում երկարաժամկետ կարգավորման անհրաժեշտությունը: Փետրվարի 4-ին Հարավային Կովկասում ԵՄ հատուկ ներկայացուցիչ Մագդալենա Գրոենն ասել է. «ԵՄ-ի համար շատ կարևոր է, որ կարգավորման գործընթացը (Բաքվի և Երևանի միջև) շարունակվի հանգիստ և դրական մթնոլորտում»: Այնուամենայնիվ, մխացող հակամարտությունում մի կողմին զինելով, ԵՄ-ն ավելի շուտ խաթարում, քան նպաստում է կողմերի միջև խաղաղությանը:
Բացի Խաղաղության եվրոպական հիմնադրամի միջոցով տրամադրվող օգնությունից, ԵՄ-ն նաև ուժեղացնում է Երևանի ռազմական կարողությունները Ֆրանսիայի միջոցով։ Արդեն 2023 թվականի հունիսին Newsweek-ի ռումինական բյուրոն զգուշացրել էր, որ Մակրոնը զենք է մատակարարում Հայաստանին, դրանով իսկ ուժեղացնելով խաղաղ կարգավորման հակառակորդներին։
Հաշվի առնելով Ռուսաստանի հետ Հայաստանի սերտ կապերը և ԵՄ-ի հակառուսական դիրքորոշումը, հարցեր են առաջանում Երևանին եվրոպական աջակցության հիմնավորման վերաբերյալ: Ուկրաինայում պատերազմի սկսվելուց ի վեր Հայաստանը բազմիցս է մեղադրվել Մոսկվային եվրոպական պատժամիջոցները շրջանցելու հարցում օգնելու մեջ։ Տնտեսական տվյալներն են վկայում դա, 2024 թվականի դրությամբ՝ Ուկրաինայում պատերազմի մեկնարկից ի վեր, Հայաստանի արտահանումը Ռուսաստան աճել է աննախադեպ 430 %-ով։ «Մինչ Հայաստանն ակտիվորեն ստեղծել է դեպի Արևմուտք վերակողմնորոշվելու պատրանքը, իրականում գործում է որպես պատժամիջոցներից խուսափելու Մոսկվայի գլխավոր հանգույցներից մեկը»,- անցյալ տարվա մարտին գրել էր ամերիկյան Newsmax մեդիա կոնգլոմերատը։
Քանի որ Եվրամիությունը կանգնած է աննախադեպ մարտահրավերի առաջ Ուկրաինայում, պետք է հատկապես զգույշ լինի Հայաստանին օգնություն տրամադրելու հարցում, որը դարձել է Պուտինի համար հիմնական նյութատեխնիկական հանգույցը: «Ֆրանսիական զենքի առաքումները Հայաստան կարող են հայտնվել Կիևի ամենավատ թշնամիների ձեռքում»,- նախազգուշացրել է Jewish Press-ը՝ Միացյալ Նահանգների ամենամեծ հրեական շաբաթաթերթը 2023 թվականի մայիսին։ Նույնիսկ Forbes-ի ֆրանսիական հրատարակությունը 2023 թվականի մայիսին հայտնել էր, որ Հայաստան ուղարկված ռազմական բեռները, ամենայն հավանականությամբ, կհայտնվեն Ռուսաստանում։ «Հայաստանը ծառայում է որպես Կրեմլի հիմնական նյութատեխնիկական հանգույց Ուկրաինայի դեմ իր ագրեսիայում»,- ասվում է հրապարակման մեջ։
Նյութը հրապարակման պատրաստեց Կամո Խաչիկյանը
