«ԵԱՏՄ-ի ու ԵՄ-ի միջև. փորձագետը գնահատել է Հայաստանի Եվրամիությանը մոտ լինելը»
ՔԱՂԱՔԱԿԱՆՈՒԹՅՈՒՆ
Հայաստանը չի կարող միաժամանակ լինել Եվրասիական տնտեսական միության և Եվրամիության անդամ, երկիրը պետք է ընտրություն կատարի: Այդ մասին հայտարարել է Հայաստանում Ռուսաստանի դեսպան Սերգեյ Կոպիրկինը։ Ավելի վաղ՝ մարտի 3-ին, Հայաստանի խորհրդարանի եվրաինտեգրման հարցերի մշտական հանձնաժողովը հետաձգել էր Եվրամիությանը երկրի անդամակցության գործընթացի մեկնարկի վերաբերյալ երկրորդ ընթերցմամբ օրինագծի քննարկումը։ «Օրինագծի քննարկումը տեխնիկական պատճառներով է հետաձգվել։ Այս հարցում մենք քաղաքական տարաձայնություններ չունենք»,- ասել էր հանձնաժողովի նախագահ Արման Եգոյանը։
ՌԴ Պետական հումանիտար համալսարանի դոցենտ Արթուր Ավակովը փաստաթղթի ընդունման հեռանկարների հարցով զրուցել է mk.ru–ի հետ:
-Փաստաթղթի հետ կապված խնդիրներ չկան, բայց այն մշակվել է ներքին, ոչ թե արտաքին քաղաքականության համար։ Ժամանակը կգա և կընդունվի, եթե նման անհրաժեշտություն լինի։ Ընդհանրապես, նույնիսկ պայմանականորեն ռուսամետ «Հայաստան» դաշինքը դեմ չի քվեարկի օրինագծին, քանի որ հասկանում է, որ շատ ընտրողներ կողմ են դրան։ Ամեն դեպքում, դա ոչ մի կերպ չի ազդի Հայաստանի եվրաինտեգրման վրա։ Երկրի ցանկությունը երբեք էլ որոշիչ չի եղել նման գործընթացում, և տեխնիկապես Երևանը նույնիսկ մոտ էլ չէ միանալուն պատրաստ լինելուն և առաջիկա 10 տարում հաստատ պատրաստ չի լինի։
Գուցե՞ Փաշինյանը որոշել է հետաձգել փաստաթղթի ընդունումը, քանի որ ցանկանում է հնարավորինս հեռու մնալ ԱՄՆ-ԵՄ հակամարտությունից։ Երևանը շահագրգռված է երկուսի հետ էլ լավ հարաբերություններով։ Միևնույն ժամանակ, Փաշինյանի հակառակորդները կարող են փորձել շահարկել Թրամփի քաղաքականությունը Հայաստանի վարչապետի դիրքերը խաթարելու նպատակով։
- Հնարավո՞ր է, որ հանրապետությունն անդամակցի ԵԱՏՄ-ին և ԵՄ-ին միաժամանակ։
-Հայաստանին ԵԱՏՄ-ի մասին հիշեցնելն արդեն ավանդույթ է դարձել։ Ի պատասխան Երևանը մշտապես հայտարարում է, որ հեռանալու մտադրություն չունի և օգուտներ է տեսնում անդամակցությունից։ Ընդհանրապես, նմանատիպ հարցերը կարող են նույն հաջողությամբ ուղղվել նաև միության այլ երկրներին: Միակ տարբերությունն այն է, որ Հայաստանը սառեցրել է հարաբերությունները ՀԱՊԿ-ի հետ և սիրախաղ է սկսել Արևմուտքի հետ, բայց դրանցից ոչ մեկը ԵԱՏՄ-ին անդամակցելու համար ուղղակի վտանգ չի ներկայացնում, թեև գոնե փորձագիտական հանրության շրջանում կան առաջարկներ պատժել Հայաստանի իշխանություններին նման պահվածքի համար։
Նյութը հրապարակման պատրաստեց Կամո Խաչիկյանը
