«Փաշինյանի քաղաքական մանևրները սպառնում են երկիրը թողնել վակուումում». «Փաստ»

«Փաստ» օրաթերթը գրում է.

runews24.ru-ն «Իդեալների ճգնաժամ և իշխանության գոյատևում. ինչո՞ւ է Հայաստանը ձգտում անդամակցել Եվրամիությանը» վերնագրով հոդվածում գրում է, որ «Ռուսաստանի առաջնորդներ» մրցույթի «Միջազգային» թրեքի հաղթող, միջազգային հարաբերությունների փորձագետ Արամ Հակոբյանը runews24.ru-ի հետ զրույցում կիսվել է դեպի Եվրամիություն Հայաստանի արտաքին քաղաքական շրջադարձի մասին իր կարծիքով։ Հաճախ կարելի է լսել, որ Հայաստանի այդ քայլը թելադրված է գաղափարական նկատառումներով և Արևմուտքին ինտեգրվելու ցանկությամբ, սակայն նման կարծիքը, ըստ փորձագետ Հակոբյանի, «միամիտ սխալ է»։ Նիկոլ Փաշինյանը և նրա թիմը բազմիցս են դրսևորել երկակի ստանդարտներ՝ դրանք քողարկելով որպես լիբերալ պոպուլիզմ։ «Սա ոչ թե իդեալների, այլ իշխանության գոյատևման խնդիր է»,- պարզաբանել է փորձագետը։

Փաշինյանի համար ԵՄ աջակցությունը դարձել է անհրաժեշտություն 2026 թվականին կայանալիք ընտրություններին ընդառաջ, իսկ արտաքին քաղաքական կուրսը փոխելու մասին նրա հայտարարությունները «ազդանշան են Բրյուսելին, թե՝ «ես քո մարդն եմ»։ Ընդդիմության ճնշումը զգալով՝ նա օգտագործում է եվրոպական հռետորաբանությունը քաղաքական դաշտում մանևրելու համար։ Երկրի ներսում հասարակական-քաղաքական լարվածությունը հասել է աննախադեպ մակարդակի, և դա շատ փխրուն է դարձնում Փաշինյանի վստահությունն իր ապագայի նկատմամբ։

«Եթե պատերազմը վերսկսվի, ապա խոսք կլինի ոչ թե Լեռնային Ղարաբաղի, այլ Հայաստանի ինքնիշխան տարածքում ուղղակի զինված հակամարտության մասին: Հայաստանը, սակայն, չի կրկնի Ուկրաինայի ճակատագիրը»,- ասել է Հակոբյանը և հարց հնչեցրել՝ ինչո՞ւ: «Մինչ Ռուսաստանի դեմ պատժամիջոցները և Ուկրաինայից փախստականների հոսքն է լուրերի թեման, ԵՄ-ն, ամենայն հավանականությամբ, կկենտրոնանա դրա վրա՝ Հայաստանը թողնելով առանց պատշաճ ուշադրության: Ավելին, Հայաստանը ԵՄ-ի համար չունի նույն ռազմավարական արժեքը, ինչ Ուկրաինան։ Երևանը պաշտպանելու համար ոչ ոք իր ստանալիք գազը չի զոհաբերի, Ադրբեջանը Եվրոպայի համար կարևոր էներգետիկ գործընկեր է, ինչը բարդության ևս մեկ շերտ է ավելացնում իրավիճակին։ Այսինքն, նման շրջադարձի հետևանքները կարող են անուղղելի լինել: Վերջին ամիսներին, աճող սոցիալական դժգոհության և Ռուսաստանից տնտեսական կախվածության պայմաններում, Հայաստանը սպառնում է հայտնվել լիակատար մեկուսացման մեջ»,– ընդգծել է Հակոբյանը՝ հավելելով, որ Փաշինյանի քաղաքական մանևրները սպառնում են երկիրը թողնել վակուումում՝ առանց դաշնակիցների, առանց երաշխիքների և առանց տնտեսական կայունության։ Վերջին հաշվով, այսօր հայ ժողովրդի առջև ծառացած առանցքային հարցն այն է, թե արդյո՞ք մարդիկ հասկանում են արտաքին քաղաքականության շրջադարձերից բխող սպառնալիքների ողջ ծավալը:

«Այսօր, ըստ էության, հարցը ազգային շահերի գոյատևման մասին է»,- ավելացրել է Հակոբյանը՝ զգուշացնելով, որ առկա մարտահրավերների անտեսումը կարող է աղետալի հետևանքներ ունենալ երկրի համար։ Ընդ որում, կարևոր է հիշել, որ որոշումներ կայացնելու համար ժամանակը սպառվում է, և որքան շուտ հասարակությունը գիտակցի ռիսկերը, այնքան ավելի մեծ կլինեն կայուն ապագայի հնարավորությունները:

Մանրամասները՝ «Փաստ» օրաթերթի այսօրվա համարում