Մոլեգնող վարակները հասել են զինված ուժեր

Եղանակային անբարենպաստ պայմանների պատճառով, ինչպես նաև սուր շնչառական վարակների ներթափանցումը և տարածումն անձնակազմի շրջանում կանխելու նպատակով Հայաստանի զինված ուժերում հետաձգվել են երդման արարողությունները, սահմանափակվել են տեսակցությունները, ժամանակավորապես արգելվել են ազատարձակումներն ու արձակուրդների տրամադրումը։

Պաշտպանության նախարարությունը պնդում է, թե կազմակերպվող բոլոր միջոցառումների նպատակը զինծառայողների առողջության պահպանումն է։

Շնչառական վարակներն արդեն տևական ժամանակ մոլեգնում են ոչ միայն Հայաստանում։ Հատկապես կորոնավիրուսի համաճարակից հետո նման վտանգավոր զարգացումները, հարկ է, որ ավելի մեծ ուշադրության արժանանային պատկան մարմինների կողմից։ Առայժմ միայն ՊՆ-ն է հաստատել նման վարակի առկայությունը, իսկ առողջապահության նախարարությունը, նույնիսկ տարբեր մասնագետների զգուշացումներից հետո որևէ քայլ չի ձեռնարկում, արտակարգ դրություն չի սահմանում, անհրաժեշտ միջոցներ չի ձեռնարկում վարակների դեմ պայքարելու համար։ Անգամ հանրությանը չեն ծանուցել։

Ըստ մի շարք մասնագետների, այս նոր շնչառական վարակն էլ չինական ծագում ունի, բավական վտանգավոր է, հատկապես խոցելի խմբերի համար։ Մեր աղբյուրների փոխանցմամբ, առողջապահության նախարարությունում տեղյակ են դրա վտանգներից, բայց Անահիտ Ավանեսյանը, իր անգործությունը կոծկելու համար հրահանգել է ոչինչ չձեռնարկել, որևէ մեկին չտեղեկացնել՝ հույս ունենալով, որ վտանգը կանցնի ինքն իրեն։ Սա պարզապես տարրական անգրագիտության, հասարակության նկատմամբ արհամարհական վերաբերմունքի դրսևորում է, որի համար, բնականաբար, ոչ ոք պատասխան չի տալու։

Հասմիկ Օթարյան