Հայաստանը քայլ կատարեց դեպի Եվրամիություն
ՔԱՂԱՔԱԿԱՆՈՒԹՅՈՒՆ
Եվրամիության փորձագիտական պատվիրակությունը Հայաստան է ժամանել քննարկելու առանց վիզայի ռեժիմի նախապատրաստման հետ կապված հարցերը։ Առաքելության կազմում ընդգրկված են Եվրոպական հանձնաժողովի միգրացիայի և ներքին գործերի գլխավոր տնօրինության, ընդլայնված հարևանության բանակցությունների գլխավոր տնօրինության, Եվրոպական արտաքին գործողությունների ծառայության և Frontex-ի, սահմանային և առափնյա պահպանության ծառայության ներկայացուցիչներ: Դրան զուգահեռ, Հայաստանի խորհրդարանն առաջին ընթերցմամբ ընդունել է օրինագիծ Հանրապետության Եվրամիությանն անդամակցելու գործընթացն սկսելու մասին։
Ինչպես նշված է փաստաթղթում, Հայաստանի իշխանությունները, արտահայտելով ժողովրդի կամքը, իրենց առջև խնդիր դնելով երկիրը դարձնել անվտանգ, պաշտպանված, զարգացած ու բարգավաճ, հայտարարում են Եվրամիությանն անդամակցելու գործընթացի սկիզբը։ Նախաձեռնությանը պաշտպանել են իշխող «Քաղաքացիական պայմանագիր» խմբակցության 63 պատգամավոր։ «Պատիվ ունեմ»-ի ընդամենը վեց պատգամավոր և մեկ այլ անկուսակցական դեմ են արտահայտվել։
Կովկասի ինստիտուտի ղեկավար Ալեքսանդր Իսկանդարյանը ng.ru-ին ասել է, որ Երևանի եվրաինտեգրման քննարկումների ֆոնին չի ակնկալվում որևէ լուրջ փոփոխություն ռուս-հայկական հարաբերություններում։ «Ճգնաժամը երկար ժամանակ է, ինչ շարունակվում է, բայց կոնկրետ այս արարքը դժվար թե կտրուկ շրջադարձերի հանգեցնի։ Միաժամանակ, քանի որ մոտենում են խորհրդարանական ընտրությունները, կարելի է ակնկալել ավելի շատ եվրոպամետ հայտարարություններ, օրինական կամ քվազիրավական որոշումներ։ Օրինակ դա կարող է լինել հանրաքվեի անցկացումը։ Հայաստանի ներսում եվրոպամետ հռետորաբանությունը լավ է վաճառվում, և «Քաղաքացիական պայմանագիր»–ը կարող է օգտագործել այն փորձելով բարելավել իր վարկանիշը: Բայց ԵՄ-ի հետ իրական հարաբերությունները, նույնիսկ, եթե դրանք ամրապնդվեն, չեն հանգեցնի նոր փոխադարձ պարտավորությունների առաջացման»,- կարծիք է հայտնել փորձագետը։
Ռազմավարական հետազոտությունների և նախաձեռնությունների վերլուծական կենտրոնի ղեկավար Հայկ Խալաթյանը նույնպես կարծում է, որ եվրաինտեգրման մասին օրինագիծը Փաշինյանի կուսակցությանն անհրաժեշտ է առաջին հերթին 2026 թվականի խորհրդարանական ընտրություններում հաղթելու համար։ Իշխանությունները ԵՄ-ին անդամակցելու հեռանկարի պատրվակով կփորձեն համոզել մարդկանց աչք փակել Լեռնային Ղարաբաղի կորստի և այլի վրա ։ «Մյուս պատճառը դեպի Արևմուտք աշխարհաքաղաքական վերակողմնորոշման կուրսի շարունակությունն է և Ռուսաստանի հետ դաշնակցային հարաբերություններից հրաժարվելը։ Բայց, եթե Մոսկվան հայտարարություններից անցնի կոնկրետ քայլերի, դա կարող է ուժեղ ազդեցություն ունենալ Երևանի արտաքին քաղաքականության վրա։ Վերջին հաշվով, Հայաստանի կառավարությունը պատասխան չունի այն հարցին, թե ի՞նչ անել, եթե Ռուսաստանը փակի իր շուկան հայկական ապրանքների համար։ Վրաստանի օրինակը ցույց է տալիս, որ նույնիսկ մեծ ցանկության և ԵՄ-ի հետ ազատ առևտրի գոտու առկայության դեպքում շատ դժվար է ոտք դնել եվրոպական շուկա։ Իսկ ռուսական շուկան, նույնիսկ մի քանի տարի վրացական ապրանքների ներմուծման ամբողջական արգելքից հետո, մնում է հիմնականը վրացական մի շարք արտահանման ապրանքների համար»,- եզրափակել է Խալաթյանը։
Նյութը հրապարակման պատրաստեց Կամո Խաչիկյանը
