«Արևմուտքը հեռու է, իսկ Ռուսաստանը մոտ է»
ՔԱՂԱՔԱԿԱՆՈՒԹՅՈՒՆ
Հայաստանի խորհրդարանն առաջին ընթերցմամբ հավանություն է տվել ԵՄ-ին երկրի անդամակցության գործընթաց սկսելու մասին օրինագծին։ Փաստաթուղթն ընդունվել է 63 ձայներով, Հանրապետության Ազգային ժողովում կա 107 պատգամավոր: Եվրամիության հետ գործընկերությունը խորացնելու նախաձեռնությունը կառավարությանն է: Միևնույն ժամանակ, ինքը՝ վարչապետ Նիկոլ Փաշինյանը, շատ հետաքրքիր դիրքորոշում է ընդունել՝ ասելով, որ այն ամենը, ինչ տեղի է ունենում, չի նշանակում Հայաստանի անդամակցություն եվրոպական հանրությանը բառիս ուղիղ իմաստով։ Ավելին, երկրի Սահմանադրության համաձայն օրենքը կարող է ուժի մեջ մտնել միայն համընդհանուր հանրաքվեից հետո։ «Ъ FM»-ի քաղաքական դիտորդ Դմիտրի Դրիզեն է իր կարծիքը հայտնել այս ամենի մասին, գրում է Kommersant.ru–ն:
«Կոպիտ ասած, սա շատ նման է շանտաժի թե՛ Ռուսաստանի, թե՛ Արևմուտքի նկատմամբ։ Այսինքն, ուշադրություն դարձրեք մեր վրա, հակառակ դեպքում մենք կգնանք հակառակ ճամբար: Ինչ էլ որ լինի, Մոսկվան դժգոհ է, սպառնում է հետևանքներով, մասնավորապես առաջարկում է Երևանին ընտրել, թե ո՞ւմ հետ է։ Եթե ցանկանում եք անդամակցել ԵՄ-ին, ապա, ամենայն հավանականությամբ, ստիպված կլինեք դուրս գալ ԵԱՏՄ-ից, և դա անխուսափելիորեն լուրջ ազդեցություն կունենա հանրապետության տնտեսական ներուժի վրա։ Բայց Արևմուտքը հեռու է, իսկ Ռուսաստանը համեմատաբար մոտ է։ Միևնույն ժամանակ, պարզ է, որ ստեղծված իրավիճակում Երևանի մուտքը Եվրամիություն շատ անհավանական է։
Փաշինյանն էլ իր հերթին երդվում է, որ մտադիր չէ որևէ կերպ հրաժարվել հետխորհրդային տարածքում ինտեգրումից։ Այնուամենայնիվ, պետք է ընդունել, որ Ռուսաստանի հարաբերությունները ԽՍՀՄ նախկին կովկասյան հանրապետությունների հետ վերջին շրջանում լավագույնը չեն։ Ղազախստանի Ակտաու քաղաքում տեղի ունեցած ավիավթարից հետո ակնհայտ անհամաձայնություն և իրավիճակի վատթարացման միտում կա Ադրբեջանի հետ։ Իսկ որտեղ կա Ադրբեջան, այնտեղ կա նաև Թուրքիա։ Վրաստանում անհասկանալի իրավիճակ է, մի կողմից կառուցողական ուժերը հաղթել են, բայց մյուս կողմից կան բողոքի ակցիաներ, հասարակական դժգոհություն։
Բայց վերադառնանք Հայաստանին։ Չի կարելի երկար նստել երկու աթոռի վրա։ Վաղ թե ուշ դուք իսկապես ստիպված կլինեք լրջորեն որոշել, թե որ ճանապարհով և ում հետ եք գնալու:
Հենց հիմա Արևմուտքը զբաղված է Ուկրաինայով, բայց եթե նրանց հաջողվի ինչ որ կերպ համաձայնության գալ այնտեղ, ապա հավանաբար ցանկություն կառաջանա ավելի շատ ազդել Կովկասի վրա, հատկապես, որ այն ռազմավարական տարածաշրջան է։ Ավելին, չի կարելի բացառել, որ Փաշինյանը որդեգրի Վլադիմիր Զելենսկու մեթոդները և փորձի տնտեսապես շահագրգռել Դոնալդ Թրամփին։ Այդ դեպքում կա հնարավորություն ևս մեկ լրացուցիչ հաղթաթուղթ ստանալու։ Ինչպես երևում է, այնքան էլ դժվար չէ մոտեցում գտնել ԱՄՆ 47-րդ նախագահի նկատմամբ, նա պրագմատիկ մարդ է, ուղղակի բիզնես և ուրիշ ոչինչ, այդ դեպքում գոնե տեսականորեն աջակցություն հնարավոր է ստանալ»։
Նյութը հրապարակման պատրաստեց Կամո Խաչիկյանը
