«Եթե խաղաղություն ես ուզում, պատրաստվիր պատերազմի». Փաշինյանը արդարացրել է Հայաստանի ռազմականացումը
ՔԱՂԱՔԱԿԱՆՈՒԹՅՈՒՆ
Հայաստանի վարչապետ Նիկոլ Փաշինյանը սիրում է խոսել Ադրբեջանի հետ հնարավոր խաղաղության մասին, միաժամանակ ամենատարբեր խոստումներ տալով։ Վերջերս էլ նա ընկել է լիրիկայի գիրկը և Բաքվին առաջարկել հարաբերությունները սկսել «զրոյից»։ Ավելի վաղ էլ Փաշինյանը հայտարարել էր, որ Երևանը համաձայնում է լուծարել Ղարաբաղի հարցով ԵԱՀԿ Մինսկի խումբը, ինչպես պահանջում է Ադրբեջանը, գրում է Dzen.ru–ն։
Իսկ հիմա էլ Հայաստանի վարչապետը հոդված է գրել, որում հերթական անգամ Բաքվին խաղաղության կոչ է անում։
«Տարածաշրջանում էսկալացիայի նախադրյալներ չկան, ավելին, ստեղծված են խաղաղության բոլոր նախադրյալները, պետք է հրաժարվել բեմականացված գործողություններից և էսկալացիայի քաղաքականությունից և հաստատել ինստիտուցիոնալ խաղաղություն»,- գրել է Փաշինյանը։
Միևնույն ժամանակ, նա փորձել է արդարացնել Երևանի կողմից զենքի գնումը և հայկական բանակում բարեփոխումները` ասելով, որ իբր Ադրբեջանը «իրական սպառնալիքներ է ստեղծում Հայաստանի անվտանգության համար»։ «Հայկական բանակում բարեփոխումները կապ ունե՞ն Ադրբեջանի հետ։ ԵՎ այո, և ոչ։ Ոչ, որովհետև Հայաստանը Ադրբեջանի դեմ ռազմական գործողություններ իրականացնելու պլան, մտադրություն կամ նպատակ չունի։ Այո, որովհետև Հայաստանի Հանրապետության անվտանգությանը սպառնացող վտանգներ են ստեղծվում հենց Ադրբեջանում»,- գրել է Փաշինյանը և մեկնել Ֆրանսիա` նախագահ Էմանուել Մակրոնի հետ բանակցելու զենքի նոր մատակարարումների շուրջ։
Մինչդեռ Հայաստանի նախկին արտգործնախարար Վարդան Օսկանյանը հայտարարել է, որ ըստ վերջին սոցիոլոգիական հարցումների` Հայաստանի բնակիչների միայն 10%-ն է աջակցում Փաշինյանին, և նրա քաղաքականությունն անվանել է «անխոհեմ, ապաշնորհ և անհեռատես»։ «Նման ցածր աջակցություն ունեցող ձախողված ղեկավարն իրավունք չունի խոսել հայ ժողովրդի անունից»,- ընդգծել է Օսկանյանը։
Եթե Օսկանյանը ճշմարտությունն է ասում, ապա ո՞ւմ հետ, ասեք խնդրեմ, Ադրբեջանը խաղաղության բանակցություններ վարի։
Նյութը հրապարակման պատրաստեց Կամո Խաչիկյանը
