ՔՊ-ում փորձում են հետողորմյա անել տրանսպորտի սակագնի բարձրացումը

Երեկ տեղի է ունեցել «Քաղաքացիական պայմանագիր» կուսակցության Նախաձեռնող խմբի նիստ: ՔՊ-ից հայտնում են, թե քննարկվել են հանրային տրանսպորտի ռեֆորմին և հանրային հաղորդակցությանն առնչվող հարցեր։ Ուշագրավ է, որ նիստին չէր մասնակցում Նիկոլ Փաշինյանը, ով գտնվում է ԱՄՆ-ում։

ՔՊ մեր աղբյուրի փոխանցմամբ, այդ օրակարգով նիստը կայացել է հենց Փաշինյանի հրահանգով, կուսակցությունում փորձում են մեթոդներ գտնել տրանսպորտի սակագնի բարձրացումը հետողորմյա անելու, սոցիալական խռովությունը կանխելու համար։ Ուստի զարմանալի չէ, որ բոլոր ելույթ ունեցողների թիրախում քաղաքապետ Տիգրան Ավինյանն է եղել, նրան ուղղակի մեղադրել են սակագինն անհիմն բարձրացնելու, առանց այն էլ ցածր վարկանիշին հարվածելու մեջ։

Փաշինյանն արդեն այսօր երեկոյան լինելու է Երևանում, իսկ առաջիկա օրերին անձամբ է զբաղվելու այդ հարցով։

Սակագնի բարձրացումն ու հաջորդած բողոքի ակցիաները նրա սրտով են, կուսակցությունում իր գլխավոր մրցակիցներից մեկին մեկուսացնելու, նրան պաշտոնից զրկելու հնարավորություն են։ Եվ այժմ ողջ ՔՊ-ն, մեկ կետից ուղղորդված թիրախավորում է Ավինյանին։ Ընդ որում, նույնիսկ այն անձանց կողմից, ովքեր այս օրերին քափուքրտնքի մեջ ստատուսներ են գրում, ուղիղ եթերներ անելու՝ համոզելու, որ սակագնի բարձրացումն անհրաժեշտ է։ Դա ընդամենը թատրոն է, որ հետո ասեն՝ իրենք փորձեցին, չստացվեց։

Ալլա Քոչարյան