Նեյմարը՝ «Սանթոս» վերադառնալու պատճառների մասին
ՍՊՈՐՏ
Բրազիլիայի հավաքականի հարձակվող Նեյմարը նշել է Սաուդյան Արաբիայի «Ալ Հիլյալից» հեռանալու եւ բրազիլական «Սանթոս» վերադառնալու պատճառների մասին։
«Դեռ հունվարի սկզբին պատկերացում չունեի, որ կվերադառնամ «Սանթոս»։ Ես «Ալ Հիլյալից» հեռանալու նպատակ չունեի։ Իմ ընտանիքը երջանիկ էր այնտեղ, ես էլ խաղալու մեծ ցանկություն ունեի։ Բայց փոխվեցին որոշ հանգամանքներ, եւ ես ստիպված եղա վերանայել դիրքորոշումս։
Ես սկսեցի տխրել մարզումներին, առօրյա կյանքում։ Այդ ամենը բացասաբար ազդեց իմ հոգեբանական վիճակի վրա։ Վերադառնալու հնարավորություն եղավ, եւ ես երկու անգամ չմտածեցի։ Հորս հայտնեցի, որ ցանկանում եմ վերադառնալ «Սանթոս», եւ ամեն ինչ գերազանց ստացվեց»,- Նեյմարի խոսքը մեջբերում է Globo-ն։
Նեյմարը «Սանթոսում» հանդես է եկել նաեւ 2009-2013 թվականներին՝ 225 խաղում խփելով 136 գոլ, կատարելով 64 գոլային փոխանցում։
