Քաղաքապետը կանխեց Փաշինյանի մտահղացումը

Երևանի քաղաքապետ Տիգրան Ավինյանը երեկ ֆեյսբուքյան իր էջում հայտարարեց, թե Երևանում փետրվարից 1-ից կներդրվի նոր ուղևորատոմս՝ մեկ ուղևորության արժեքը սահմանելով 150 դրամ: Սա գործելու է ամբողջ 2025 թվականի ընթացքում։ Ներկայումս մեկ ուղևորության արժեքը 100 դրամ է: Քաղաքապետը նշել է, որ առաջարկվող մեկ ուղևորության համար սահմանված 150 դրամն ամեն տարի կարող է փոփոխվել առավելագույնը 10 դրամով և միայն շարունակվող բարեփոխումների պայմաններում:

Քաղաքապետի այս որոշումից հետո սոցցանցերում սրվեցին խոսակցությունները, թե ՔՊ-ն հետքայլ է անում տրանսպորտի թանկացման հարցում։ ՔՊ-ականներն էլ, մեկ կենտրոնից ուղղորդված փորձում էին ուղիղ եթերներով և տարատեսակ գրառումներով համոզել, որ իրենց կայացրած որոշումը լավագույնն է։ Նաև համոզում էին, որ դրա հեղինակը ոչ թե քաղաքապետարանն է, այլ գործադիր իշխանությունը՝ Նիկոլ Փաշինյանի գլխավորությամբ։

Մեր աղբյուրների փոխանցմամբ, այս հարցն էլ վերաբերում է Փաշինյան-Ավինյան առայժմ ծպտյալ հակամարտությանը, որը կարող էր առաջիկա օրերին վատ ծառայություն մատուցել Տիգրան Ավինյանին։ Բանն այն է, որ Նիկոլ Փաշինյանը որոշել է հունվարի 31-ին ասուլիս հրավիրել, որտեղ էլ բեմադրելու էր «Ավինյան, սիրուն չի» օպերացիան։ Այդկերպ, նա ոչ միայն փորձելու էր սիրաշահել հանրությանը, այլև քաղաքական լուրջ հարված հասցներ Երևանի քաղաքապետի դիրքերին։ Ավինյանն էլ, կանխազգալով կամ ինչ-որ բանից տեղյակ լինելով, նախահարձակ եղավ և հայտարարեց տրանսպորտի սակագինը նվազեցնելու որոշման մասին։ 

Ալիսա Ղուկասյան