Փաշինյանի ակտիվացումը Ավինյանի սրտով չէ

«Քաղաքացիական պայմանագրին» մոտ կանգնած աղբյուրներով՝ Ավինյանը նեղ շրջապատում նվնվացել է, որ ընդդիմությունը քիչ էր պրոբլեմ ստեղծում իր համար տրանսպորտի հարցում, Նիկոլ Փաշինյանն էլ մտել է խաղի մեջ, իբր թե՝ քարոզելով տրանսպորտի թանկացման օգտին։ Փաշինյանի ակտիվացումը լուրջ հարված է հասցրել քաղաքապետարանի նախաձեռնությանը, քանի որ իր ցածր ու օրեցօր նվազող վարկանիշով գործող իշխանության ղեկավարը միայն վնաս է հասցնում գործին։

Դեռ Երևանի ավագանու ընտրություններին Ավինյանը ՔՊ-ում ասում էր, թե ընտրություններում իր ձախողման մեջ ամենամեծ ներդրումն ունեցել է Նիկոլ Փաշինյանը, որն ընտրություններից երկու օր առաջ էր մտել խաղի մեջ, Ավինյանին քարոզելու փոխարեն զգալի նվազեցրել էր նրա ձայները։

Մինչդեռ քաղաքապետի թեկնածուն ամեն ինչ անում էր ՔՊ-ից տարանջատվելու, ցածր վարկանիշից ձերբազատվելու համար, իսկ Փաշինյանի ներգրավումը միայն վնաս հասցրեց։ Հիմա էլ նույնը տրանսպորտի հետ է կապված լինելու, որքան գործադիրի ղեկավարը խառնվում է իր մերձավոր շրջապատի հետ, այնքան ցանկացած գործ ավելի է բարդանում։

Ավինյանի թիմում լուրջ կասկածներ կան, որ Փաշինյանը հատուկ է անում, որ ձախողի տրանսպորտային ռեֆորմը, իսկ ձախողումը կոտրի Ավինյանի վրա։ Լավ առիթ է Փաշինյանի համար, որ իրեն ուղղակիորեն չենթարկվողին դուրս մղի քաղաքականությունից։ 

Նարինե Սիմոնյան