Փաշինյանին մեղադրում են մրցակիցներից ազատվելու ցանկության մեջ
ՔԱՂԱՔԱԿԱՆՈՒԹՅՈՒՆ
Հայաստանի ընդդիմությունը Նիկոլ Փաշինյանի կառավարությանը քննադատելու նոր առիթ է գտել, դա Ադրբեջանում սկսված Լեռնային Ղարաբաղի Հանրապետության նախկին ղեկավարների դատավարությունն է։ Փաշինյանի ընդդիմախոսները պնդում են, որ նման պայմաններում Բաքվի հետ բանակցությունները շարունակելը ծիծաղելի է, սակայն վարչապետն աջակցում է հարևան երկրի գործողություններին, քանի որ չի ցանկանում, որ Ղարաբաղի ղեկավարությունը հայտնվի Երևանում, գրում է Ng.ru–ն։
Բաքվում հունվարի 21-ին շարունակվել է անցյալ ուրբաթ սկսված Լեռնային Ղարաբաղի ղեկավարների դատավարության նախնական բաց լսումները։ Դահլիճում եղել է 15 մարդ, այդ թվում ինքնահռչակ հանրապետության նախագահներ, կառավարության և խորհրդարանի անդամներ, գեներալներ Արկադի Ղուկասյանը, Արայիկ Հարությունյանը և Բակո Սահակյանը, Դավիթ Իշխանյանը, Դավիթ Բաբայանը, Լևոն Մնացականյանը, Դավիթ Մանուկյանը, Գարիկ Մարտիրոսյանը, Մելիքսեթ Փաշայանը, Դավիթ Ալլահվերդիյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը։ Նրանք մեղադրվում են ցեղասպանության, ագրեսիայի, պատերազմ պլանավորելու և վարելու, խոշտանգումների, սպանությունների և այլ հանցագործությունների մեջ։ Լեռնային Ղարաբաղի Հանրապետության նախկին պետնախարար Ռուբեն Վարդանյանի գործն առանձնացվել է առանձին վարույթ։ Դատավարությունը կշարունակվի հունվարի 27-ին։ Վարդանյանը, ի տարբերություն իր գործընկերների, չի մեղադրվում ցեղասպանության մեջ, սակայն պատերազմ հրահրելու և այլ ծանր հանցագործությունների մեղադրանքները մնում են։ Արդյունքում նրանց բոլորին սպառնում է ցմահ ազատազրկում։
«Նրանք, ամենայն հավանականությամբ, կստանան առավելագույն պատժաչափեր։ Մեղմություն չի լինելու: Միաժամանակ, Ադրբեջանում մահապատիժ չկա։ Ինչ վերաբերում է այն խոսակցություններին, թե դատարանի վճռից հետո Վարդանյանը և մյուսները կարող են գնալ պատիժը կրելու Հայաստանում, ապա ոչինչ բացառել չի կարելի, բայց դեռ վաղ է այդ մասին խոսել։ Դատավարության ավարտից անմիջապես հետո նրանց, ամենայն հավանականությամբ, կուղարկեն ադրբեջանական բանտ։ Նշանակություն չկա, որ բանակցություններ են ընթանում նրանց ապագայի վերաբերյալ։ Ավելին, եթե նրանք փորձեն արտաքին ճնշում գործադրել Բաքվի վրա, ադրբեջանական հասարակությունը շատ բացասաբար կարձագանքի»,- Ng.ru-ին ասել է քաղաքագետ Իլգար Վելիզադեն։ Ըստ փորձագետի, այդ դատավարությունն Ադրբեջանում պատմական է համարվում։ Երկրի բնակիչները ոչ միայն պատիժ են սպասում առանձին քաղաքական գործիչների և զինվորականների համար, այլ նաև ուզում են իմանալ, թե ինչպես է գործել ինքնահռչակ հանրապետությունը, ինչ է ներկայացրել մեղադրյալներից յուրաքանչյուրը, ով է տրամադրել գումարը, զենքը և այլն։
Լեռնային Ղարաբաղում մարդու իրավունքների նախկին հանձնակատար Արտակ Բեգլարյանը կարծում է, որ այն, ինչ կատարվում է Ադրբեջանում, չի կարելի դատավարություն համարել, սակայն Հայաստանի իշխանությունները նման հայտարարություններ չեն անի, քանի որ որոշել են ոչ մի հարցով չառերեսվել իրենց հարևանի հետ։ «Աբսուրդն այն է, որ այս պայմաններում դեռ խոսում են խաղաղության մասին»,- ասել է Բեգլարյանը։
Իր հերթին ԱԺ պատգամավոր, ՀՀ երկրորդ նախագահի որդի Լևոն Քոչարյանը հայտարարել է, որ պետությունն ամենուր պետք է աշխարհին հիշեցնի իր հայրենակիցների ճակատագրի մասին։ Միևնույն ժամանակ, նա կասկածում է, որ Փաշինյանի իշխանությունն ի վիճակի է գլուխ հանել այդ խնդրից, ինչպես նաև ընդհանրապես Ադրբեջանի հետ խաղաղ բանակցություններից։
«Պատիվ ունեմ» խմբակցության պատգամավոր Տիգրան Աբրահամյանը զգուշացրել է, որ դատավարությունը կարող է հանգեցնել նրան, որ Բաքուն հայ-ադրբեջանական հակամարտության կարգավորման շրջանակներում նոր պահանջներ ներկայացնի Երևանին։ Որպես օրինակ նա բերել է Բաքվում տարածված տեղեկությունը, որ 2020 թվականի պատերազմի ժամանակ Ադրբեջանում խաղաղ բնակչությանը հարվածելու հրամանը տվել է ոչ թե Լեռնային Ղարաբաղի նախկին նախագահ Հարությունյանը, այլ Փաշինյանը։
«Դա հատկապես նրանց համար, ովքեր ուշ են հասկանում կամ իրենց սխալմամբ հայտնի կենդանու տեղն են դնում։ Իշխանությունների ստեղծած բարենպաստ պայմաններում Ադրբեջանը կփորձի հնարավորինս շատ պոկել Հայաստանից` մեզ զրկելով անկախությունից ու կենսունակությունից»,- ընդգծել է Աբրամյանը։
Մինչդեռ Հայաստանի խորհրդարանի մարդու իրավունքների պաշտպանության մշտական հանձնաժողովի փոխնախագահ, իշխող «Քաղաքացիական պայմանագիր» կուսակցության անդամ Ռուստամ Բակոյանը նշել է «մարդու հիմնարար իրավունքների զանգվածային խախտումներ» կապված Ադրբեջանում մեղադրվող հայերի հետ։ «Փաստերը ցույց են տալիս, որ հայ ազգի ներկայացուցիչների նկատմամբ խտրականությունը պայմանավորված է նրանց ազգությամբ»,- ասել է իրավապաշտպանը։
Նրա գործընկեր Վահագն Ալեքսանյանը պարզաբանել է, որ կուսակցությունը կոնկրետ չի քննարկել այդ թեման, բայց բոլոր անդամներն ունեն նույն կարծիքը: «Եթե կարծում եք, որ մխիթարության համար պետք է մեկ-երկու կոպիտ խոսք ասել, որոնք կարող են օգնել մեր գերիների վերադարձին, ապա սխալվում եք։ Լրացուցիչ հրապարակայնությունն ու տեսանելիությունը միայն կխանգարեն այդ գործընթացին։ Վստահեցնում եմ, որ Հայաստանի կառավարությունը ոչ մի վայրկյան չի դադարեցրել և չի դադարեցնի այդ ուղղությամբ աշխատանքը»,- ասել է Ալեքսանյանը։
Քաղաքագետ Տիգրան Քոչարյանը, սակայն, չի հավատում «Քաղաքացիական պայմանագրի» ներկայացուցիչներին: «Հայաստանի իշխանությունների դիրքորոշումը չափազանց հեռու է դրանից: Կարծես դատում են մարդկանց, ովքեր վերջին 30 տարիների ընթացքում Հայաստանի ու նրա պատմության հետ կապ չեն ունեցել։ Մասնավորապես, Փաշինյանը նախընտրում է չխոսել այդ թեմայի շուրջ և ընդհանրապես չհիշատակել ԼՂ քաղաքական ու ռազմական առաջնորդների մասին։ Պատճառը երևի այն է, որ մեղադրյալներից յուրաքանչյուրը, հայտնվելով Երևանում, կարող է ղեկավարել ղարաբաղահայությունը և դառնալ իշխանությունների համար հզոր գրգռիչ։ Փաշինյանի համար լավ կլիներ, որ այդ մարդիկ երբեք չվերադառնան Հայաստան»,- ասել է Քոչարյանը։
Նյութը հրապարակման պատրաստեց Կամո Խաչիկյանը
